Алтынньы 10-27 күннэригэр Саха Өрөспүүбүлүкэтин бочуоттаах гражданина, Духуобунас академиятын академига, П.А.Ойуунускай аатынан Государственнай Бириэмийэ лауреата, норуот маастара, тимир ууһа, ойууһут, айанньыт, бөлүһүөк, Уһуйааччы Борис Федорович Неустроев-Мандар Уус төрөөбүтэ 80 сааһыгар төрөөбүт дойдутугар, Таатта улууһун Баайаҕатыгар, биир нэдиэлэ устата ыытыллар араас хабааннаах тэрээһиннэр саҕаланнылар.
Ол курдук, алтынньы 10-17 күннэригэр «Мандар Уус айар аартыктара» оҕолорго кэтэхтэн уруһуй куонкуруһа, «Мандар Уус олоҕун, айар үлэтин ыллыктарынан» оскуола оҕолоругар кылаас чаастара ыытыллыбыттара.
Бүгүн, алтынньы 20 күнүгэр, Мандар Уус «Аартыктаах айаным түгэннэрэ», «Айар-тутар Баайаҕа» быыстапкалар үөрүүлээх аһыллыылара, «Дьоһуннаах кэпсэтии» Мандар Уустуун сэһэргэһии, «Үбүлүөйгүнэн эҕэрдэ, Мандар Уус!» үөрүүлээх чаас, «Мандар Уус олоҕун, айар үлэтин ыллыктарынан» 5-11 кылаас үөрэнээччилэригэр оонньуу, «Мандар Уус» саха олоҕун кэлим түмэлигэр «Мандар Уус утумнааччылара» быыстапка үөрүүлээх аһыллыыта буолан ааста.
Салгыы нэдиэлэ устата «Мандар Уус» Айымньы, Айылгы киинигэр «Мандар Уустуун сэһэргэһии» төрөппүттэри кытта көрсүһүү, «Ньургуһун» уһуйааҥҥа «Истиҥ иэйиинэн, илиибит сылааһынан» уһуйаан ийэлэрин уус-уран оҥоһуктарын быыстапката, «Баайаҕа-уус дьон биһигэ» аһаҕас дьарыктар (оскуолаҕа бэлэмнэнии бөлөх оҕолоругар), уһуйаан иитиллээччилэрэ Мандар Уустуун бырааһынньыктааҕы көрсүһүүлэрэ, эҕэрдэлэрэ, Р.Р. Романов аатынан Кииҥҥэ «Эһиэхэ, бар дьоммор, Өбүгэм Кэрэтин уунабын!» тимир ууһа, ойууһут Б.Ф.Неустроев төрөөбүтэ 80 сааһын дьоро киэһэтэ, И.М.Хатылаев аатынан Баайаҕа орто оскуолатыгар «Мандар Уус түһүлгэтэ» улуустааҕы научнай-практическай кэмпириэнсийэ буолаллара күүтүллэр.
Борис Федорович Неустроев-Мандар Уус сындааһыннаах сыратынан, тулхадьыйбат дьулуурунан, сынтарыйбат тулуурунан ситиспит үлүскэннээх үлэтин үтүмэн үгүс үтүө түмүктэрэ саха норуотун, ону ааһан бүттүүн киһи-аймах үйэлэргэ муспут баайа, муудараһа буолан, кэлэр көлүөнэлэргэ бэриллэр, үйэлэри ситимниир.
Өссө да уһун кэмнэргэ тимир ууһун кыһата кытыаста турдун, Мандар үөрэҕэ кэлэр кэнчээри ыччакка тэнийэн истин!
keskil14.ru