Тимофей Сметанин «Мэхээлэчээн булчут кэпсээннэрэ» оҕо аймах таптаан ааҕар айымньыта. Бу кэпсээннэргэ булчут киһи тыаҕа хайдах сылдьара, мүччүргэннээх сырыылара оҕо интэриэһигэр сөпкө таба тайанан ойууланар. Ааҕааччы айымньы сүрүн дьоруойун, булчуту, кытта тэҥҥэ алтыһан, кэпсэнэр хартыыналар кини хараҕар субу баардыы биир-биир арыллан, салаа-салаа чочуллан иһэллэр.
Бу кэпсээннэр уол оҕону сиэр-майгы өттүнэн элбэххэ үөрэтэллэр, иитэллэр. Мэхээлэчээн дьоруойдара хайаан да булчут киһи тыаҕа сылдьар сиэрин-туомун тутуһаллар. Холобур, “Куһу ураҕаһынан бултуурбут” диэн кэпсээҥҥэ уол икки куһу өлөрөн баран, биири доҕоругар бэрсэр. Саха киһитэ бултуйдаҕына, булдуттан үөлээннээхтэригэр бэрсэрэ. Бу былыр-былыргыттан, өбүгэлэрбититтэн илдьэ кэлбит үтүө үгэспитин тутуһуу буолар.
Бу кэпсээннэргэ омуннааһын ньымата миигин олус интэриэһэргэппит ураты көстүү буолар. Холобур, этэрбэһэ кытары чаархаан буолар, төбөтүгэр кус сымыыттыыр, кутаттан бөрө таһаарар, оннооҕор эһэни миинэн турардаах. Ити курдук, омуннааһын киһи сүргэтин көтөҕөр, күллэрэр уонна сэргэхситэр.
Тимофей Сметанин оҕо суруйааччыларыттан биир чулуулара буолар. Хас биирдии оҕоҕо анаммыт айымньыта иитэр-үөрэтэр суолталаах, олоҕу-дьаһаҕы кытта ыкса сибээстээх. Кини айымньылара үйэ-саас тухары сүтэн-симэлийэн хаалыа суохтара диэн бигэ эрэллээхпин.
Нария Хоютанова, XI кылаас,
Г.Д.Бястинов-Бэс Дьарааһын аатынан Чымынаайы орто оскуолата, Таатта улууһа
keskil14.ru