Балаҕан ыйын 1 күнэ – Билии күнэ. Михаил Николаевич Готовцев аатынан Танда орто оскуолата саҥа үөрэх дьылыгар үөрэнээччилэри, үлэһиттэри уонна ыалдьыттары көрсө аанын тэлэччи арыйда. 2025-2026 саҥа үөрэх дьылыгар оскуолабыт 79 оҕону үөрэ-көтө көрсөр.
Бу күн оскуолабыт боруогун аан маҥнай атыллаан, маҥнайгы кылааска 7 үөрэнээччи киирдэ. Бастакы учууталынан Саха Өрөспүүбүлүкэтин үөрэҕириитин туйгуна, үрдүк категориялаах учуутал Марфа Реворьевна Жучкина ананна. 9-с кылааска 7 оҕо үөрэниэ. Кылаас салайааччыта бастакы категориялаах саха тылын уонна литературатын учуутала Любовь Семеновна Охлопкова. Онтон быйылгы выпускниктарбыт 16-лар. Кылаас салайааччыта география учуутала Евдокия Романовна Васильева.
2025-2026 сыллааҕы үөрэхпит аһыллыытын сиэрин-туомун Арассыыйа былааҕын көтөҕүүнэн көрүстүбүт. Былааҕы көтөҕөр бочуоттаах быраабы оскуолабыт дириэктэрэ Константин Георгиевич Готовцев, быйыл оскуоланы бүтэрэр выпускник Вика Колодезникова уонна оскуола боруогун аан маҥнай атыллыыр үөрэнээччи Айсен Булдаков ыллылар.
Бу күн эҕэрдэ тылларын нэһилиэкпит баһылыга Савва Иванович Егоров, оскуолабыт дириэктэрэ Константин Георгиевич Готовцев, улуустааҕы үөрэх управлениетын начальнигын солбуйааччыта Иван Иванович Никонов анаатылар. Саҥа үөрэх дьылыгар иитии-үөрэтии хайысхатыгар туох саҥа уларыйыылар киирбиттэрин иһитиннэрдилэр. Быйыл биһиги улууспутугар уопсайа 220 оҕо маҥнайгы кылааска үөрэнэ киирбит.
Маны таһынан эҕэрдэ тыллары “Кэнчээри” оҕо саадын кэллэктиибин аатыттан иитээччилэрэ Саргылаана Алексеевна Готовцева, тэрилтэлэр салайааччылара, маҥнайгы кылаас төрөппүттэрэ эттилэр. Быйылгы выпускниктар кырачаан бырааттарыгар, балтыларыгар баҕа санааларын, эҕэрдэ тылларын эттилэр.
Биһиги оскуолабытыгар быйылгы үөрэх дьылыгар 6 саҥа учуутал үлэлии кэллэ: алын кылаас учууталлара Марфа Реворьевна Жучкина, Елизавета Ивановна Варламова, физика учуутала Василиса Федоровна Жиркова, история уонна обществознание учуутала Павел Петрович Попов
үлэ уруогун учуутала Александр Гаврильевич Птицын, математика учуутала Саргылана Николаевна Григорьева.
Биһиги бу күн саҥа үлэлии кэлбит физика учуутала Василиса Федоровна Жиркованы көрсөн кэпсэттибит.
– Быйыл М.К. Аммосов аатынан Хотугулуу-Илиҥҥи Федеральнай университет физико-техническэй институтун бүтэрэн дьүөгэбин Елизавета Ивановна Варламованы кытта Танда орто оскуолатыгар үлэлии кэллибит. Биһиги дьүөгэлии буоламмыт иккиэн тэҥҥэ бараарыбыт үлэ миэстэитин ыйыталаспыппытыгар Тандаҕа үлэ миэстэтэ көстөн, кэллибит. Саҥа үөрэх дьылыгар саҥа арыйыылары, саҥа ситиһиилэри баҕарабын, – диэн кэпсээтэ В.Ф. Жиркова.
Билии күнүн үөрүүлээх күнүгэр бу күн бастакы «Дьоһуннааҕы кэпсэтии» уруогар ыҥырар маҥнайгы чуорааны быйылгы үөрэх дьылыгар оскуола боруогун аан бастаан атыыллыыр Айсен Булдаков уонна Танда орто оскуолатын 2025-2026 үөрэх дьылын выпускнига Вика Колодезникова тыаһаттылар.
Ити курдук алтан чуораан тыаһынан үөрэх дьыла саҕаланна, оҕо аймах үөрүүтүнэн оскуолабыт аана арылынна.
Валерия ГОТОВЦЕВА, XI кылаас, Снежанна ГОТОВЦЕВА, Х кылаас
Туйаара Мамонтова, Айыллаана Готовцева видеолара
Туйаара Мамонтова хаартыскалара
М.Н. Готовцев аатынан Танда орто оскуолата, Уус Алдан