2025-2026 саҥа үөрэх дьыла саҕаламмытынан!
Балаҕан ыйын 1 күнүгэр Арассыыйа үрдүнэн саҥа үөрэх дьыла саҕаламмытынан Билии күнэ бэлиэтэнэр.
2025-2026 үөрэх дьылыгар Арассыыйа 40 тыһыынча оскуолатыгар уопсайа 18 мөлүйүөн үөрэнээччи Билии күнүн бэлиэтиир Кинилэртэн 1,5 мөлүйүөн оҕо аан бастаан бастакы кылааска киирдэ.
Онтон Саха өрөспүүбүлүкэтигэр 627 оскуола, 445 оҕо саада, 42 орто анал үөрэх кыһалара уонна 176 эбии үөрэхтээһин тэрилтэлэрэ бааллар.
2025-2026 үөрэх дьылыгар 153 тыһыынчаттан тахса үөрэнээччи Билии күнүн бэлиэтиир. Оскуола боруогун аан бастаан 13 тыһыынчаттан тахса оҕо атыллаан, бастакы кылааска киирэр.
***
Историяны эргитэн көрөр эбит буоллахха, урут Арассыыйаҕа саҥа үөрэх дьыла, билиҥҥи курдук, оруобуна балаҕан ыйын 1 күнүттэн саҕаламмат этэ. Холобур, Петр Первэй саҕана оҕолору үөрэтии атырдьах ыйын бүтүүтэ, балаҕан ыйын ортото эбэтэр алтынньы ыйтан саҕаланара.
Оннооҕор Сэбиэскэй сойуус саҕана, 30-с сыллар ортолоругар, үөрэх дьыла бачча чыыһылыттан саҕаланар диэн чопчу суоҕа. ССРС Народнай комиссардарын сэбиэтэ 1930 сыл атырдьых ыйын 14 күнүнээҕи уурааҕар, “8-10 саастаах оҕолор күһүн оскуолаҕа ылыллыахтаахтар” эрэ диэн ыйыллыбыт.
1932 сылтан балаҕан ыйын 1 күнүгэр бары дойдуларга эйэ уруоктара, сэриини утары акциялар ыытыллар буолбуттара. Онтон ССРС Народнай комиссардарын сэбиэтин уурааҕынан, 1935 сылтан Сэбиэскэй Сойуус бары оскуолаларыгар үөрэх дьыла балаҕан ыйын 1 күнүттэн саҕаланар буолбута.
1984 сылтан балаҕан ыйын 1 күнэ Сэбиэскэй Сойуус үрдүнэн Билии күнүнэн биллэриллибитэ. Онтон ыла Билии күнэ биһиги олохпут арахсыспат аргыһа буолбута.
Билии күнүн биир ураты көстүүтэ – сибэкки дьөрбөтө. Бу учууталга махтал, сүгүрүйүү уонна саҥа үөрэх дьыла саҕаламмытынан истиҥ эҕэрдэ бэлиэтэ.
***
2025-2026 саҥа үөрэх дьылыгар туох уларыйыылар киирдилэрий? Бу туһунан Саха Өрөспүүбүлүкэтин Үөрэх уонна наука миниистирэ Нюргуна Афанасьевна Соколова кэпсиир:
– Хас биирдии үөрэнээччини, учууталы, иитээччини үөрэх саҥа дьылынан эҕэрдэлиибит уонна хас биирдиибитигэр ситиһиилэри баҕарабыт. 2025-2026 үөрэх дьылыгар туох саҥа киирэр диир буоллахпытына, бастатан туран, үөрэх программатыгар саҥа дьиссипилиинэ киирэр. Бэһистэн сэттис кылааска диэри төрөөбүт дойдубут историятын үөрэтэр буолуохпут. Ааспыт сылга улахан үлэни ыытаммыт, история учууталлара, учуонайдар бу кинигэни таһаардылар. Инньэ гынан учууталларбыт саҥа учебнигынан саҥа билиилэри биһиги үөрэнээччилэрбитигэр иҥэриэхтэрэ.
Онтон эбии үөрэхтээһини этэр буоллахпытына, “Разгорворы о важном”, “Россия – мои горизонты” диэн кылаас чаастарбыт урукку курдук буола туруохтара. “Моя семья” диэн эбии саҥа дьиссипилиинэ киирдэ.
Биир улахан уларыйыынан Арассыыйаҕа биир халыып үөрэх расписаниета баар буолла. Онон хас биирдии үөрэх программатын сыллааҕы тиэмэлэрэ барыта биллэн турар буолаллар. Инньэ гынан үүммүт саҥа үөрэх дьылыгар Арассыыйа оскуолаларыгар барыларыгар биир расписаниенан, биир тиэмэни Арассыыйа хас биирдии оскуолатыгар биир кэмҥэ үөрэтэр буолуохпут.
***
Саҥа үүммүт 2025-2026 үөрэх дьыла барыбытыгар ситиһиилээх буоллун!
keskil14.ru