Муома оройуонун Улахан Чыыстай сэлиэнньэтигэр «Мааҕыр» ыстаада иһинэн үлэлиир «Оралчимна» оҕо сайыҥҥы лааҕыра быйыл 23-с сылын ыытыллар. 14 күн устата икки кэминэн (сезонунан) лааҕыр улуус араас нэһилиэктэриттэн табаһыт буолуон, ыстаада олоҕун билиэн-көрүөн, элбэххэ үөрэниэн баҕалаах оҕолору бэйэтин тула муһар. Ол курдук, быйылгы лааҕыр иккис кэмигэр 10 оҕо мустан сайыннарын туһалаахтык атаардылар.
Ыстаадаҕа үгүс өттүгэр Н.С. Тарабукин аатынан Улахан Чыыстай орто оскуолатын оҕолоро сылдьаллар, оттон быйыл Хонууттан баҕалаах оҕолор эмиэ мустубуттар. 5 кылаастан саҕалаан 11 кылаас үөрэнээччилэригэр тиийэ хаһыс да сылларын сөбүлээн, көтүппэккэ сылдьар оҕолор бааллар.
Оҕолор кыра саастарыттан ыстаада олоҕун-дьаһаҕын ис иһиттэн эттэринэн-хааннарынан билэ, таба иитии сатабылларыгар үөрэнэ, хайаны дабайа, айылҕаҕа хайдах сылдьары билэ улааталлар. Ону таһынан, төрүт дьарыктарын — тирии имитэргэ, эт хатарарга, уучаҕы уонна аты миинэргэ, маамык быраҕарга, таба муоһун уонна туйаҕын эмтииргэ — барытыгар үөрэнэллэр. Маннык оҕолор олоххо бэлэмнээх буола улааталлара саарбаҕа суох.
Маны таһынан, айылҕаттан талааннаах оҕолор үгүстэр: ким үҥкүүнэн дьарыктанар, ким ыллыыр, уруһуйдуур, төрүт таҥаһы-сабы тигэр, спордунан үлүһүйэр. Бары өттүнэн сайдалларыгар, үөрэххэ-үлэҕэ кыһамньылаах буоларга ыстаада олоҕо эмиэ улахан оруоллаах буолуохтаах.
Ол туһунан, Мирослав Терешкин (11 кыл., Хонуу), Сандаара Петрова (11 кыл., Улахан Чыыстай) уонна Ньургун Дьячков (8 кыл., Улахан Чыыстай) кэпсиир видеоларыгар сиһилии көрүҥ:
keskil14.ru