Хайахсыт нэһилиэгин олохтооҕо Елена Николаевна Борисова дьиэтээҕи сыры оҥоруунан сүөһү ииттиэҕиттэн ыла дьарыктанар – 30-тан тахса сыл буолбут.
– Саҥаспын Елена Николаевна Ксенофонтованы көрөммүн үөрэммитим. Кини ыаммытынан үүтү сэппэрээтэрдээн сүөгэй уонна абыраат ылара. Онтон абырааты миискэҕэ кутан иэдьэгэй буолуор диэри сылытара. Салгыы уутун сүүрдэн сиидэлиир этэ. Иэдьэгэйи, дьиҥинэн, сырга туһанарга мясорубкалыыр ордук эбит эрээри мин бэйэм бытарытабын, – диэн кэпсиир Елена Николаевна.
Кини сыры оҕолорун, ыччаттарын доруобуйаларыгар, уҥуохтара кытаатарыгар туһалаах буоллун диэн ис сүрэҕиттэн астыыр.
Елена Николаевна атын дьоҥҥо туһалаах буоллун диэн дьиэтээҕи сыры хайдах оҥорорун туһунан ырысыабын үөрэ-көтө үллэстэр.
– Дьиэтээҕи сыры оҥорорго биир чаайнай ньуоска туус, сода, 3-4 устуука сымыыт, 200 гр ынах арыыта, 1 кг иэдьэгэй наада. Арыыны сылаас хобордооххо уулларабын. Онтон содалаах тууһуу арыыга кутан буккуйабын. Ол кэнниттэн сымыыттаах иэдьэгэйи кутан баран, тохтоло суох буккуйабын. Биир маасса буолбутун кэннэ, лаппаахынан бэрэбиэркэлиэххэ сөп. Иһиккэ кутан, сойутабын. Дьэ уонна сырбытын тотоойутук сиибит, – диэн билиһиннэрдэ.
Виктория БОРИСОВА, IX кылаас,
А.П. Илларионов аатынан Хайахсыт орто оскуолата, Чурапчы