Таатта улууһун Баайаҕа нэһилиэгэр И.М. Хатылаев аатынан Баайаҕа орто оскуолатыгар, Мандар Уус үөрэҕинэн саха сатабылыгар уһуйуу, үөрэтии, такайыы “Мандар Уус кыһата” сайыҥҥы лааҕыр 2007 сылтан саҕалаан үлэлиир. Лааҕыр төрүттээччилэринэн буолаллар Борис Федорович Неустроев-Мандар Уус, Изабелла Александровна Сивцева уонна Николай Иванович Егоров. Лааҕыры сатабыллаах эдэр салайааччы Екатерина Иннокентьевна Хатылаева үлэтин-хамнаһын ымпыгар-чымпыгар диэри тэрийэн, лааҕыр үлэтэ-хамнаһа үрдүк таһымҥа ааһар.
Лааҕырга сыл ахсын республика араас муннуктарыттан 1000-тан тахса оҕо уус-иис мындыр идэтигэр уһуйуллар. Быйыл 10-с үбүлүөйдээх сылын Клавдия Филипповна уонна Герман Васильевич Хатылаевтар уһуйааччылардаах “Мандар Уус кыһата” лааҕыр иһинэн ыытыллар “Төрүт дорҕоон” лааҕыр үлэлиир.
Оҕолор сахалыы өйгө-санааҕа сыстан, төрүт дьарыкка уһуйуллан, кутаа уот сылааһыгар хатарыллан, буһан-хатан, ийэ хара көлөһүннэрин тоҕон, эт илиинэн быһах охсон, тутан-хабан, бүөбэйдээн оҥорон таһаарбыт кылааннаахтарын кыыныгар укпут күннэриттэн оттомурбут, боччумурбут, биир көнө сүрүннэммит курдук буолаллар… Уолаттарбыт дьиҥ эр киһи эйгэтигэр сылдьан, эр киһилии тутан-хабан, эр киһилии быһаарсан, кэпсэтэн-ипсэтэн, эр киһилии өйдөһөн, эр киһилии сананан, кырдьык да, саха эр киһитин оскуолатын ааһаллар. Хас биирдии сезон түмүгэр уолаттар охсубут быһахтарын күрэҕэ ыытыллар, манна күөн күрэс тыҥааһыннаахтык барар. Быһахтар кумааҕыны, болдьоҕу быһыы, мас кыһыы түһүмэхтэригэр тургутуллаллар. Түмүккэ, 3 кыайыылаах быһах хаһаайына “Кылаан Уус” аат бастакы, иккис, үһүс үрдэлин сүгэн, дьэ, астыныы бөҕө буолаллар, үлэлэрин үтүө түмүгүн көрөллөр.
Биир дойдулаахтарбыт, сахалыы музыканы, матыыбы үйэтитээччилэр, тэнитээччилэр Клавдия, Герман Хатылаевтар “Төрүт дорҕоон” оскуолаҕа оҕолору хомуйан — күпсүүр тыаһа ньиргийэр, кырыымпа тыаһа лыҥкыныыр, хомус тыаһа дьиэрэйэр. Манна сахалыы төрүт дорҕоону сэҥээрээччи оҕолор мусталлар. Күн устата оҕолор бэркэ сөбүлээн дьарыктаналлар, хас биирдии уһуйуллааччы ураты эйгэҕэ киирэн, сахалыы куттара уһуктан, ырыанан дайа сылдьаллар.
Борис Федорович Неустроев-Мандар Уус биир саамай улахан ыра санаатынан оҕону, ыччаты тимиринэн төрүт уһаныыга уһуйар кыһалар уоттара өрөспүүбүлүкэбит бары муннуктарыгар кытыаста умайара буоллар диэн. Бу баҕа санаа олоххо киирэригэр бары бигэ эрэллээхпит.
keskil14.ru