Хабылыкка, хаамыскаҕа илии уонна өй биир тэҥҥэ үлэлииллэр. XXII «Манчаары оонньууларыгар» сахалыы остуол оонньууларыгар күрэс иккис күнэ.
Хабылыкка, хаамыскаҕа уопсайа 21 улуустан барыта 114 күрэстэһээччи кытта сылдьар. Олор истэригэр 16 кыыс уонна 16 уол кыттыыны ылаллар. Күрэстэһээччилэр ортолоругар 46 успуорт маастара уонна сэттэ «Сахаада успуорт» маастардара бааллар.
Хабылык, хаамыска быраабылалара
Хаамыскаҕа оонньооччу биэс хаамысканы уҥа ытыһыгар тутар. Биирин үөһэ, түөрдүн остуолга ыһа быраҕаат, үөһэ бырахпыт хаамыскатын хабар. Онтон биир хаамысканы үөһэ быраҕар, остуолтан биири ылар уонна үөһэ бырахпытын хабар. Итинник гынан хаалбыттарын хомуйар. Иккис түһүмэххэ хаамыскатын үөһэ быраҕан баран остуолтан иккилиинэн ылар. Үһүскэ бастаан биири онтон үһү. Төрдүс түһүмэххэ хаамыскатын үөһэ быраҕар уонна остуолтан түөрдү биирдэ ылар. Бэсиһигэр остуолга сытар хаамыскаларын барытын биир ытыһыгар мунньар.
Хабылыкка 30 устуука хабылык баар буолар, бары биир кээмэйдээх буолаллар, онтон хабылыгы
барытын илииҥ кэтэҕэр тутан ылан, биири барытын хабан ылыахтааххын, биэс хабылык хааллаҕына, ол биэһи барытын хабан ылыахтааххын. Түөрт хааллаҕына, биири хабан ылаҕын, үс хааллаҕына үһү, онтон икки хааллаҕына, иккини биирин хабаҕын, биир хааллаҕына, тарбаҕын икки ардыгар түһүөхтээх, арай атын сиргэ түһэр түгэнигэр, ааҕыллыбат. Хайаан даҕаны тарбаҕын икки ардынан хабыахтааххын.
Маастар нуорматын хайдах толоруохха сөбүй?
Маастар нуорматын толорорго бэйэтэ туспа очукуолаах уонна бириэмэлээх, холобура, хабылыкка эр дьоҥҥо биэс мүнүүтэ, кэрэ аҥаардарга бириэмэтэ арыый улахан буолар. Хаамыскаҕа очукуо быһаарар. Холобура, эр дьоҥҥо 40 очукуо ыллахтарына, маастар нуорматын толороллор. Кэрэ аҥаардар 35 очукуо ыллахтарына, маастар буолаллар. Бэйэтэ хас көрүҥ аайы туспа нормативтаах. Ону таһынан ханнык эмит күрэхтэһиигэ миэстэлэһэриҥ ирдэнэр.
Хабылык, хаамыска киһи эт-хаан, өй-мэйии өттүнэн сайдарыгар көмөлөһөллөр, доруобуйаны бөҕөргөтөллөр.
Бэлэмнээтэ Стас Попов.
Уһулуу, таҥыы Авдей Неустроев, «Кэскил» оҕо пресс-киинин эдкордара.
keskil14.ru