Биир ыал курдук иллээхпит

Ньурбабыт улууһа 19 нэһилиэктээх. Ол онтон саамай улахан, саамай элбэх киһилээх нэһилиэгэ – мин төрөөбүт Антоновкам. Антоновкаттан элбэх биллэр спортсмен, тренер тахсыбыта.

Саха сирин үрдүнэн эрэ буолбакка, бүтүн Арассыыйаҕа, аан дойдуга биллибит боксердар элбэхтэр. Ол курдук, антоновкалар киэн туттар биир чулуу киһибит — мин убайым Александр Иванов.

Аҕам саастаахтарга Александр Иванову Саха сиригэр билбэт киһи суоҕа буолуо. Кини бүтүн ССРС аатыттан кыттан, аан дойдуга чемпионнаабыта. Билигин кини үрдүк аатын сүгэр спортивнай саалалаахпыт уонна олорбут уулуссатыгар кини аатын иҥэрбиттэрэ. Сылын аайы Александр Иванов бирииһигэр кик-боксаҕа оҕолорго өрөспүүбүлүкэтээҕи күрэхтэһии ыытыллар, саҥа ааттар тахсаллар, мантан кынат анньынан, улахан түһүлгэлэргэ киирсэллэр.

Спортивнай оскуола интэринээтигэр билигин элбэх оҕо араас улуустан кэлэн үөрэнэ сылдьар. Кинилэр Антоновка Н.Н. Чусовской аатынан орто оскуолатыгар үөрэнэллэр.

Нэһилиэкпит биир киэн туттар киһитэ, биллэр боксер, политик, Олимпиада призера, Европа, Россия хас да төгүллээх чемпиона — Георгий Балакшин. 2016-2018 сылларга Георгий Балакшин СӨ Спорка миниистиринэн ананан үлэлээбитэ. Кини төрөөбүт дойдутугар өрүү  күүс-көмө, сүбэ-ама буолар. Ол курдук, бу кулун тутар ыйга оскуолабыт аттыгар саҥа спортивнай саала акылаата түстэ.

Аатырбыт спортсменнарбыт ситиһиилэрэ ыччакка холобур буолар.  Маныаха тренердэрбитигэр махтаныах тустаахпыт. Эдэр спортсменнарын оҕолорун курдук бүөбэйдээн, ситимнээхтик үлэлээн, үчүгэй көрдөрүүлэри ылаллар.

Мин 2016 сыллаахха боксанан үлүһүйэ сылдьыбытым. Кыра да ситиһии дьаныардаах дьарыктан, улахан сыраттан кэлэрин өйдөөбүтүм. Боксер оҕолору кытта бииргэ интэринээккэ олорон, күрэхтэһиилэргэ  кыттан, кыайыы үрдүк чыпчаалын ылар үөрүүтүн туппут дьоллоохпун.

Онно үгүс дьоннуун билсибитим, элбэххэ үөрэммитим,  нэһилиэгим дьоно хайдах курдук бары түмсүүлээхтэрин, биир ыал курдук иллээхтэрин, барытыгар тэҥҥэ сылдьалларын, бэйэ-бэйэлэрин өйдөһөллөрүн-өйөһөллөрүн сөхпүтүм.

Сахалар бары, антоновкалар курдук, бэйэ-бэйэбитин өйдөһө, көмөлөһө сылдьыахха, оччоҕо эрэ бкыайыахпыт, ситиһиэхпит.

Дмитриева Джамиля,

 “КАЛЕЙДОСКОП” оҕо телестудиятын юнкора,

Ньурба куората.