«Саха Өрөспүүбүлүкэтин олох-дьаһах коммунальнай хаһаайыстыбата» СУТ Бүлүүтээҕи филиалын Тааһаҕардааҕы учаастагын үлэһиттэрин кытта билсиһэ бара сырыттыбыт. Бары билэбит, ОДьКХ уһун тымныы кыһыммытыгар нэһилиэк тэрилтэлэрин, ол иһигэр оскуолабытын итиинэн хааччыйар тэрилтэ буоларын. Өр кэмнэргэ тэрилтэни нэһилиэк дьокутаата, «ОДьКХ бэтэрээнэ”, “ОДьКХ бочуотунай үлэһитэ”, “СӨ ОДьКХ сайдыытыгар үтүөлэрин иһин” анал бэлиэлэрдээх Родион Алексеевич Осипов сатабыллаахтык салайар. Уопсайа бэйэтин кытта 7 үлэһиттээх, 4 оператор, 1 слесарь-сварщик, 1 слесарь.
Бүгүн операторынан Федор Акимович Харлампьев үлэлии сылдьар эбит. Кини нэһилиэкпит биир киэн туттар ыччата буолар. Көҥүл тустууга РФ спордун маастара, элбэх российскай, өрөспүүбүлүкэтээҕи көҥүл тустууга, хапсаҕайга күрэхтэрин кыайыылааҕа, призера буолар. Аны эбиэт кэннэ оҕолору тустууга эрчийэр. Эр дьон эрэ үлэтэ буолбатах эбит, кинилэр быыстарыгар Феодосия Дмитриевна Поскачина оператордыыр. Аҕыйах сыллааҕыта мас тардыһыыта киэҥ эйгэҕэ тахсарыгар Федосия Дмитриевна эмиэ кылаатын киллэрсибитэ. Ол курдук мас тардыһыытыгар РФ спордун маастарын нуорматын толорбута. Элбэх ахсааннаах российскай, өрөспүүбүлүкэтээҕи мас тардыһыытын күрэхтэрин кыайыылааҕа. Ону таһынан ОДьКХ иһинэн ыытыллар гиирэ спордугар элбэх ситиһиилэрдээх, теннискэ эмиэ оонньуур. Слесарь-сварщик Сергей Николаевич Воловик, элбэх оҕолоох аҕа, кулууп тэрээһиннэрин, кэнсиэртэрин көхтөөх кыттааччыта. Родион Алексеевич дуобакка нэһилиэк чиэһин элбэхтэ көмүскээн кэллэ. Бу курдук биһиги ОДьКХбытыгар чөл олоҕу өрө туппут көхтөөх дьон үлэлииллэринэн киэн туттабыт.
Поскачина Сандаара, Суханов Айаал,
11 кылаас үөрэнээччилэрэ. Тааһаҕар, Бүлүү.