Быйыл өрөспүүбүлүкэбит үрдүнэн «Экстра Синема» тэрилтэ 40 кинозалы арыйбыта. Үөрүүлээх арыллыы алтынньы ыйга Ил дархан кыттыылаах буолан ааспыта. Ол курдук, Лөгөй нэhилиэгин киин бөhүөлэгэр Кэптэнигэ Бүөтүр Оҕотоойоп аатынан сынньалаҥ киинин иһинэн үлэлиир «Legoy Cinema» кинозал үлэтин саҕалаабыта.
Кинозал арыллыаҕыттан элбэх киинэни көрдүбүт. Аан бастаан «Кыталыктаах кырдалым» киинэни көрөн астыммыппыт. Онтон ыла элбэх сахалыы, нууччалыы киинэлэри көрдүбүт: «Карина», «Харчы», «Бэйбэрикээн-2», «Робин Гуд и хранители леса», «Пассажиры» уо. д.а. Нэhилиэк олохтоохторо саамай үөрбүппүт диэн бүтүн республиканы кытары бииргэ саҥа тахсыбыт киинэни тэҥинэн көрөр буоллубут.
Республика үрдүнэн «Триумф» («Өрөгөй») киинэни премьера күн икки тыһыынчаттан тахса киhи көрбүтэ. Бу күн «Legoy Cinema» кинозалга Лөгөй нэhилиэгин олохтоохторо эрэ буолбакка, чугастыы сытар бөһүөлэктэртэн кэлэн көрөн дуоһуйан барбыттара. Бу киинэни бары олус күүппүппүт. Бэлиэтии көрбүппүт, мас тардыһыытыгар дьарыктанар «Лөгөй мадьынылара» тренердарын кытары Петр Николаевич Переваловтыын уонна тустууга дьарыктанар оҕолор тренердарынаан Куприян Егорович Поповтуун тэҥҥэ көрө кэлбиттэрин. Биhиги «Экстра синема» тэрилтэҕэ махталбытын биллэрэбит. Ырааҕыттан, чугаһыттан тутулуга суох саҥаттан саҥа киинэлэри тэҥҥэ көрөр кыахтаммыппытыттан олус үөрэбит!
Янис СЫСОЛЯТИН, Дима НАФАНАИЛОВ Лөгөй лиссиэй-интернаатын «SiTiM LegMedia» юнкордара.