Алтынньы 17-18 күннэригэр Дьокуускайдааҕы үп уонна экономика кэллиэһин баазатыгар «2024 сыл бастыҥ устудьуона» бүтүн Арассыыйатааҕы күрэх эрэгийиэннээҕи түһүмэҕэ буолан ааста. Бу күөн күрэскэ Н.Е.Мординов-Амма Аччыгыйа аатынан Харбалаахтааҕы үөрэхтээһин холбоһугуттан икки устудьуон кыттан, бэйэлэрин кыахтарын холонон көрдүлэр. Кинилэр кимнээҕий?
Оконешников Александр «Баһаарынньык-23» группа устудьуона, Слепцов Василий «Хайа аһаҕас үлэтин машиниһа» идэ үһүс куурсун устудьуона. Устудьуоннары бу күрэххэ бэлэмнээн кытыннардылар директоры иитэр үлэҕэ солбуйааччы Большакова Н.Е, директор советнига Захарова В.В.,уопсай дьиэ иитээччитэ Цой М.В.
Күрэхтэһээччилэр икки күн устата маннык түһүмэхтэргэ ситиһиилээхтик кытыннылар: «Мин идэм», «Аһаҕас уруок», «Бэйэни билиһиннэрии», «Дьыалабыай оонньуу», тургутук, «Аһаҕас уруок».
Александр Оконешниковы ох сааҕа дьарыктыыр энтузиаст-тириэнэр Ньургун Иванович Тистяхов бэйэтинэн кэлэн өйөөн, сүбэ-ама буолбутугар олус үөрдүбүт уонна махтанныбыт. Уолаттар иккиэн да олус үчүгэйдик, кыһаллан туран, кытыннылар.
Уопсай түмүккэ, Александр Оконешников «Сыл бастыҥ устудьуона 2024» күөн күрэс «Сыл бастыҥ спортсмена» номинациятыгар 2-с миэстэни ылан, Харбалаахтааҕы үөрэхтээһин холбоһугун өрөспүүбүлүкэ таһымыгар дорҕоонноохтук ааттатта, эрэлбитин түһэн биэрбэтэ. Кэлэктиип аатыттан Александры ситиһиитинэн эҕэрдэлиибит!
Маннык ситиһиилэртэн тирэҕирэн, үүнэн-үрдээн ис диэн алгыыбыт!
Устудьуоннар идэлэригэр эппиэтинэстэрин үрдэтэр маннык күрэхтэр сылтан-сыл ыытыллан, тэнийэн-кэҥээн истиннэр!
Надежда Большакова, иитэр үлэҕэ директоры солбуйааччы.