Лөгөй лиссиэй-интернат актыбыыстара Байкал, Бурятия, Монголия бүтүн республикатааҕы туурга кыттыыны ыллыбыт. Тур салайааччыта Геннадий Иванович Охлопков, Лөгөй орто оскуолатын 2006 сыллаах выпускнига. Бу бырайыагы Геннадий Иванович тэрийэн үлэҕэ киллэрбит. Барыта биһиги республикабытыттан 30 оҕо буолан сынньанан кэллибит.
Биһиги бастаан Бурятия Улан-Удэ куоратыгар тиийбиппит. Улуу Байкал кытыытыгар турар «Байкальский Бор» оҕо сынньанар лааҕырыгар 3 күн сырыттыбыт. Бу үс күн иһигэр улуу Байкалы сөҕө махтайа көрдүбүт.
Салҕыы Монголия киинигэр Улан-Батор куоракка 2 күн дуоһуйа сырыттыбыт. Түөрт сулустааах «Continental Hotel» диэн гостиницаҕа олорбуппут. «Чыҥыс Хаан» музейын олус интэриэһиргээн көрдүбүт, манна оҕолор саамай сөхпүппут Чыҥыс Хаан аты миинэн олорор статуятын. Улан-Батор куорат киэһээҥҥи олус да кырасыабай көстүүтүн астына көрбүппүт.
Улан-Удэ Бурятия куоратыгар тахсан «Иволгинский Дацан» сырыттыбыт. Оҕо култуура киинигэр бэйэбит сахабыт норуотун култууратын, үҥкүүтүн көрдөрдүбүт уонна бурят норуотун култуураларын кытта билистибит. Уонна биллэн турар, Бурятия норуотун минньигэс аһын арааһын амсайдыбыт, аатырбыт монгольскай буузылары боруобалаатыбыт. Бу тур биһиэхэ оҕо саас биир умнуллубат түгэнинэн буолла.
Лөгөй лиссиэй-интернат юнкордара — Павел Герасимов, Родион Перевалов «SiTiM LegMedia»