Москваҕа… ыра санаа сиригэр

ЮНКОР ДНЕВНИГИТТЭН

От ыйын 26 күнэ. Москва устун айаммыт үһүс күнэ. Күн аайы көрсүһүү. Төбөҕөр олус элбэх информация киирэр. Барыта туһалаах, инники өттүгэр наадалаах информация. От ыйын 26 күнүгэр Россия Суруналыыстарын дьиэтигэр тиийэ сырыттыбыт. Сойуус сэкэрэтээрэ Роман Александрович Серебряный суруналыыс киһи эбээһинэһин, пресс кииҥҥэ үлэлиир киһи бастыҥ хаачыстыбата хайдах буолуохтааҕын туһунан кэпсээтэ. Бу тэрээһиҥҥэ бэлиэтээн истибитим диэн — суруналыыс оҥорон, суруйан, хаартыскаҕа түһэрэн таһаарыыта сүрдээх улахан эппиэтинэс. Бэйэтин эрэ иннигэр буолбатах – дьон, уопсастыба иннигэр.

***

Салгыы Москва куорат саамай кэрэ сиригэр – «Остров Мечты» сынньалаҥ киинигэр тиийдибит. Аата да этэрин курдук, ыра санаа сирэ. Тутуута, тыына, салгына – барыта кырдьык ыра санаа дойдута. Cанааҕын өрө көтүтэр тутуулар баалларыттан киһи хараҕа ирим-дьирим барар. Аҥаардас дьиэлэрин, хараххын араарбакка эрэ, өр да өр көрө-көрө туруоххун баҕараҕын.

Аҕыйах чаас иһигэр бу кэрэ сири барытын киһи сатаан кэрийбэт эбит дии санаатым. Бииртэн биир сиргэ салгыы киирэн бара туруоххун баҕараҕын. «Остров мечты» кииҥҥэ табыгастаахтык сынньалаҥ, күүс ылынан аһыыр сир, наадалааххын барытын атыылаһан хааччынар сир, эккин-хааҥҥын эрчийэр паарка – барыта баар.

Москва куорат кэлбит ыалдьыттарыгар бэлэхтиир ыра санаа муннугар сылдьыбыт күммүн умнуом суоҕа. Маны эрэ буолуо дуо, Москва куоракка атаарар хас биирдии күммүн куруутун өйдүү- саныы сылдьыам.

Вадим КОЛЕСОВ, Х кылаас,

А.П. Илларионов аатынан Хайахсыт орто оскуолата, Чурапчы