Бүгүн, от ыйын 4 күнүгэр, М.К. Аммосов аатынан ХИФУ КФЕНыгар VIII «Азия оҕолоро» спортивнай оонньуулар чэрчитинэн ыытыллыбыт тоҕус күннээх саахымат турнира түмүктэннэ. Кыайыылаахтар ааттара ааттанна. Олус тыҥааһыннаах, долгутуулаах киирсиилэр буоллулар. Кыттааччылар 9 күн устата туох баар сыраларын ууран туран киирситилэр. Казахстан хамаандата турнирга үчүгэй бэлэмнээхтэрин көрдөрдүлэр. Түөр кыттааччыттан үс спортсмен кыайыылаахтар ааттарыгар киирдилэр.
Түмүктүүр турга уолаттарга Казахстан хамаандатыттан Алан Петухов Палестинаттан кэлбит Седер Мухаммеды кытта финальнай киирсиини көрдөрдүлэр. Казахстан уола бу киирсии түмүгүнэн VIII «Азия Оҕолоро» спортивнай оонньуулар саахымат күрэҕин муҥутуур кыайыылааҕынан ааттанна.
Иккис миэстэни уонна үрүҥ көмүс мэтээл хаһаайына эмиэ Казахстан хамаандатыттан Даниял Сапенов ылла. Боруонса мэтээли Узбекистан хамаандатыттан Эмир Шаршанбеков ылла.
Кыргыттарга бастакы миэстэни уонна кыһыл көмүс мэтээли Москваттан сылдьар Хафизова Диана ылла, үрүҥ көмүс мэтээли Казахстантан сылдьар Айуру Алтынбек ылла, боруонса мэтээли Ураллааҕы федеральнай уокруг хамаандатыттан сылдьар Елизавета Телюхина ылла.
Харысхан Андреев, Сандаара Поскачина
Оҕо пресс-киинин эдэр кэрэспэдьиэннэрэ