Дойдубут киин куоратыгар, Москваҕа НХСБ – Норуот хаһаайыстыбатын ситиһиилэрин быыстапката диэн баар (ВДНХ). Тэриллиэҕиттэн манна Сэбиэскэй Сойуус араас ситиһиилэрин көрдөрөллөр, кэпсииллэр уонна чулуу, бастыҥ үлэһиттэри хайҕабыл быһыытынан күүлэйдэтэ, сырытыннара, көрдөрө ыыталлар эбит.
Онно мин эбэм Лидия Михайловна Сергучева (Уарова), Элгээйи орто оскуолатын бастыҥ үөрэнээччитэ, эдэр натуралистар куруһуоктарын көхтөөх кыттааччыта буолан 8-с кылаас кэнниттэн 1978 сыллаахха Бүтүн Сойуустааҕы эдэр натуралистар (юннаттар) конференцияларыгар кыттыыны ылбыт, дакылаат аахпыт эбит. Кини онно аан дойдуга аатырбыт энтузиаст учуутал Борис Николаевич Андреев тэрийбит Элгээйитээҕи Айылҕа музейын иһинэн үлэлиир эдэр юннаттар үлэлэрин, кэтээн көрүүлэрин кэпсээбит. Саха сириттэн өрөспүүбүлүкэтээҕи юннаттар станцияларын методиһа Александр Федорович Дегтяревтуун уонна Орджоникидзевскай оройуон Ой орто оскуолатын үөрэнээччитэ Люда Роевалыын сылдьыбыттар. Онно айылҕа харыстабылын павильонугар Сэбиэскэй Сойуус араас муннуктарыттан элбэх оҕо кыттыыны ылбыт. Кинилэргэ Лев Дуров тыыннаах муннугуттан кэлэн элбэх иитэр кыылларын: хахайы, попугайдары, эбисийээнэлэри о.д.а. көрдөрбүттэр. Өссө НХСБ-га ол сахха аатырбыт «Самоцветы» вокально-инструментальнай ансамбль кэнсиэрин көрбүт, космонавтика музейын сэргээбит уонна саамай сөбүлээбитэ, билиҥҥэ диэри астынара, Москваҕа тиийдэҕинэ хайаан да сылдьар сирэ – 15 союзнай өрөспүүбүлүкэлэргэ анаммыт киин фонтан эбит.
Онно сылдьан эбэм зоомагазинтан Борис Николаевич сакааһынан икки тыыннаах хомяктары атыылаһан, кып-кыра клеткаҕа уган, бэрийэн илдьэ кэлбит, ол эрэн кэлэн баран сатаан харайбатах, онтун күлэ-күлэ кэпсиир. Дьоно: “Кутуйах манна аҕыйаҕар дылы, кутуйах атыылаһан кэллиҥ дуо?” – диэбиттэр.
Эбэм оскуолаҕа бастыҥ үөрэнээччи, көхтөөх пионер, комсомолка эбит. Комсомольскай тэрилтэ сэкирэтээрэ, пионерскай дружина председателэ эбит. Иккитэ Комсомол КК «За активную работу», биирдэ «За отличную учебу» значоктарынан наҕараадаламмыт, Элгээйи орто оскуолатын Бочуотун кинигэтигэр киирбит. Оскуола кэнниттэн Саха государственнай университетын биолого-географическай факультетын бүтэрэн биология, химия учууталынан, иитэр үлэҕэ дириэктэри солбуйааччынан Күндэйэ орто оскуолатыгар үлэлээбитэ, ол кэннэ билигин 35-с сылын нэһилиэк дьаһалтатыгар тутаах специалиһынан үлэлиир. Саха Өрөспүүбүлүкэтин муниципальнай сулууспатын туйгуна, бэтэрээнэ.
Мин эбэбин, эһэбин, ийэбин, эдьиийбин кытта 2021 сылаахха Москваҕа бара сылдьан НХСБ-га анаан сылдьыбыппыт, көрбүппүт, космонавтика музейыгар сылдьан космоска көппүт Белка, Стрелка ыттар чуучалаларын олус сэргээбитим.
Миша Сергучев,7 кылаас,
Б.Н. Егоров аатынан Күндэйэ орто оскуолата,
Сунтаар улууһа