Кубулҕаттаах кулун тутар ыйбыт номнуо ааһан, күнүнэн күлүмүрдүү көрөр, сырдыгынан сыдьаайар муус устар ыйга үктэннибит. Муус устар – тапталы, оҕо кутун айааччы Айыыһыт Хотун ыйа.
Муус устар 7 күнэ Хайахсыт олохтоохторугар олус сэргэхтик ааста. Бу күн норуокка Балаҕачыанайап таҥаратын күнүнэн, Саха өрөспүүбүлүкэтигэр Аҕа, онтон аан дойдуга Чэгиэн, чөл турук күннэринэн биллэр. Хайахсыкка муус устар 7 күнүн үс бэлиэ түгэнин бииргэ холбоон «Дорообо, сандал саас!» норуот күүлэйин тэрийэн ыыттылар.
Түөлбэлэринэн араас интэриэһинэй күрэхтэр ыытылыннылар: «Сандал саас» түһүлгэни киэргэтии;
«Уруйдуубун сандал сааһы, айхаллыыбын ылбаҕай ырыабынан» частушка; «Халтарыйан сырылаа» салааскалаах сүүрүү; «Биир тэтимҥэ» ойбон тэһиитэ; «Тоҥуу хаары оймотоммун ойдоруом» тоҥуу хаарынан сүүрүү; «Тирэҕим инникигэ эрэлим» канат тардыһыыта.
Бу курдук түһүмэхтэринэн үс түөлбэ олохтоохторо илин-кэлин түһүстүлэр. Уопсай түмүккэ «Чараҥ» түөлбэ бастакы, «Таргыйах» иккис, «Ураһалаах» үһүс миэстэ буоллулар.
Үтүө үгэскэ кубулуйбут биирдиилээн кыттыы күрэхтэрэ эмиэ ыытылыннылар. Муҥутуур кыайыы иһин эр дьоҥҥо «Ойбон тэһиитин» күрэҕэр инники күөҥҥэ Семен Андреев таҕыста. Оҕолорго Роберт Поисеев кыайыыны ситистэ. «Массыына соһуутугар» Леонид Борисов тэҥнээҕин булбата.
Кыһыны атаарыы биир сэргэх үгэс буолбут кэрэ аҥардар икки ардыларыгар ыытыллар «Хаатыҥка быраҕыы» күрэҕэ буолар. Быйыл Диана Андреева бастаата. Людмила Феофанова иккис, Оксана Кириллина үһүс миэстэ буоллулар.
«Сааскылаана Куо» диэн бэйэ илиитинэн куукула тигиитин күрэҕэр кырачаан кыргыттар сөбүлээн кытталлар. Быйыл Июлия, Вика Бродниковалар тикпит куукулалара бастакы миэстэ буолла. Сардаана Петрова, Лиана Каженкина иккис, Сандаара Борисова үһүс миэстэни ыллылар.
Онтон салгыҥҥа көтөр «Змей» оҥоруутугар кыайыылаахтарынан Алгыс Тимофеев, Амелия Каженкина буоллулар.
«Дорообо, сандал саас!» норуот күүлэйигэр Хайахсыт олохтоохторо олус үчүгэйдик тэринэн кэлэн кытыннылар, сандал сааһы уруйдуу-айхаллыы көрүстүлэр.
Хайахсыкка сандал сааһы атаарар тэрээһин туһунан видеону манна көр https://vk.com/wall-199463452_18773
Вадим КОЛЕСОВ, Х кылаас,
А.П.Илларионов аатынан Хайахсыт орто оскуолата, Чурапчы
Ааптар хаартыската, видеота