Аҕа дойду көмүскээччилэрин күнүн көрсө «Хорсун быһыы иһин» РФ Судаарыстыбаннай мунньаҕын өйдөбүнньүк мэтээлинэн наҕараадаламмыт эдэр көмүскээччилэр тустарын кэпсиибит.
Амма улууһун Болугур орто оскуолатын 6-а кылааһын үөрэнээччитэ Юлиан Семенов бу сайын ууга түспүт кыыһы өрүһүйбүтэ. Ол туһунан хорсун уол бу маннык кэпсиир:
— 2023 c. cайыныгар от ыйын куйаас күннэригэр ийэбин уонна бырааттаах балтыбын кытта Амма өрүскэ сөтүөлүү сылдьыбыппыт, онтон сөтүөлээн бүтэн, тахсан истэхпитинэ, биэрэккэ дьоннор хаһыыларын истибиппит. Көрбүппүт, дьон ууга, дириҥ өттүгэр, баран эрэр этилэр. Ийэм тута быыһыы сүүрбүтэ, мин кини кэнниттэн сүүрбүтүм. Икки кыра оҕо уонна эбээлэрэ ууттан сатаан тахсыбакка тураллара. Ийэм тута ууга өрүһүйэ ыстаммыта, кыра уолу таһаарбыта. Онтон мин номнуо өйүн сүтэрбит кыыһы ууттан таһаарбытым. Кинилэр наһаа дириҥҥэ киирбиттэр этэ. Ийэм мин быыһыы ыстаммыппар куттаммыт этэ, «Сатаан киирэҕин да, кииримэ» диэн ыйыппыта, ону мин «Киирэбин» диэт, ууга харбаан киирэн, кыыһы биэрэккэ таһаарбытым. Кыыс өйө суох этэ, ону маҥнайгы суһал көмөнү оҥорбуппут, хата, өйүгэр кэлбитэ. Бастаан хорсун быһыыны оҥордум дии санаабат этим, кэнники биирдэ өйдөөбүтүм. Мин санаабар эр санаалаах киһи диэн күүстээх, туохтан да куттаммат буолуохтаах дии саныыбын. Оҕолорго доруобай сылдьыҥ, чөл олоҕу тутуһуҥ, спордунан дьарыктаныҥ, дьоҥҥутугар көмөлөһүҥ, телефоҥҥа наһаа аралдьыйымаҥ диэн этиэм этэ.
Юлиан бэйэтэ волейболист, спордунан сөбүлээн туран дьарыктанар. Билигин кини Владивостокка «Океан» лааҕырга сынньана сылдьар.
2023 с. ахсынньытыгар Саха өрөспүүбүлүкэтигэр хорсун быһыыны оҥорбут 11 үөрэнээччигэ РФ сенатордара Егор Борисов, Сахамин Афанасьев, Саха сиринээҕи МЧС салайааччыта Павел Гарин наҕараадалары туттарбыттара. Бу үөрүүлээх быһыы-майгы онус төгүлүн ыытыллар «Дьоруой оҕолор» диэн 2014 сыллаахтан үлэлиир патриотическай бырайыак чэрчитинэн уонна Арассыыйаҕа Быыһыыр сулууспа күнүгэр аналлаах ааспыта.
Онтон 2022 сыллаахха бэлиэтэммит Дьоруой-оҕолор тустарынан биһиги «Дьоһуннааҕы кэпсэтиигэ» кэпсээн турабыт.
keskil14.ru