Чурапчыга Федерация сэбиэтин чилиэнэ Егор Борисов үбүлүөйүгэр анаммыт «Село—территория возможностей» диэн өрөспүүбүлүкэтээҕи форум ааста. Баһылыкпыт Васильев көҕүлээһининэн, Өймөкөөн улууһуттан нэһилиэкпит делегацията кытынна.
Форум Маҕаайы мааны кырдалыгар буолла. Аатырбыт Чурапчы күүстээҕэ Кыдаала аатынан «Кыдаала оонньуулара» күрэхтэһии, Россияҕа биһирэммит СХПК бородууксуйатын дьаарбаҥката, «Оскуолаҕа бэлэм буол» атыы-эргиэн түһүлгэтэ, «Дойдум дьонун алгыһынан» хаартыска быыстапката буоллулар.
Форум кэмигэр 10 мөлүйүөн бириистээх грант куонкуруһа ыытылынна. Саха сирин араас муннуктарыттан барыта 169 сайаапка киирбит. «Международная кооперация и экспорт», «Цифровая экономика», «Производительность труда и поддержка занятости», «Жилье и комфортная среда», уопсайа, 10 сиэксийэ үлэлээтэ.
Биһиги, Өймөкөөн улууһун култуураҕа управлениетын специалиһа С.Сивцев, оскуола дириэктэрэ Е.Посельская, учууталлар А.Алексеева, С.Спиридонова, «Малое и среднее предпринимательство и поддержка индивидуальной предпринимательской инициативы», «Образование» сиэксийэҕэ кытынныбыт. Төһө да түмүктүүр түһүмэххэ киирбэтэрбит, сүрдээҕин астынныбыт, үгүс дьоннуун билистибит. Ол инники үлэбитигэр туһалыа диэн эрэнэбит.
Форум кэмигэр икки мусуойга сырыттыбыт. Биир мусуойу Өймөкөөҥҥө төрөөбүт, улааппыт А.А. Попов, билигин биэнсийэлээх, тэрийбит. Кини идэтинэн быраас, ол эрээри чуучуланы оҥоруунан үлүһүйэр эбит. Саха сирин араас кыылларын, көтөрдөрүн чуучулатын оҥорон туруорбут. Ону тэҥэ байыаннай тиэхиньикэни оҥорор. Олбуорун иһигэр байыаннай сөмөлүөт, пушка, Т-34 тааҥка тураллар. Билигин өссө улахан сөмөлүөтү оҥоро сылдьар. Этнография мусуойа матырыйаала аҕыйах эрээри, былыргы дьахталлар таҥастара, киэргэллэрэ, сахалыы иһиттэр, үлэ тэриллэрэ киһи интэриэһин тардаллар.
Альбина Алексеева, история, обществознание учуутала.
Өймөкөөн.