2026 сыллаах «Shanghai International Art Week» аан дойдутааҕы искуустуба бэстибээлигэр Дьокуускай куорат 17 №-дээх орто оскуола 4 «Г» кылааһын «Талбан» түмсүү ситиһиилээхтик кытынна.
Бу бэстибээлгэ барарга, оҕолор төрөппүттэрин кытта баҕа санаа оҥостон, икки сыллааҕыттан фольклорга бэлэмнэнэн барбыттар. Манна биллэр-көстөр сахалыы фольклору баһылаабыт, Надежда Викторовна Дмитриева салайбыт. Фольклорга үөрэнии элбэх сыраны ылан, үгүс үлэни, үөрэҕи көрсүбүттэр. Надежда Викторовна бэйэ төрөөбүт тылынан саҥарыыга, ырыаҕа-тойукка сүрдээх күүскэ үөрэтэн-такайан, улахан ситиһиигэ сырдык уот буолан угуйбут. Кинини кытта тэҥҥэ эмиэ биир биллэр, уһулуччу талааннаах, оскуолабыт музыкаҕа учуутала, Надежда Яковлевна Макарова көмөтүн астына ахталлар. Кини оҕолору араас ырыа эйгэтигэр угуйан, араас күрэххэ көхтөөхтүк кытыннаран, дьон иннигэр толлубакка ыллыырга үөрэммиттэр. Онтон үҥкүүлэрин айылҕаттан талааннаах хореограф, фитнес тренера, Лилия Петровна Дмитриева туруоран, ритм, пластика диэн тугун чугастык билбиттэр. Бу икки сыл устата «Самый классный класс» уо.д.а. күрэхтэргэ ситиһиилээхтик кыттан, талааннарын сайыннарыыга үгүс болҕомтону уурбуттар.
2026 сыллаах «Shanghai International Art Week» аан дойдутааҕы искуустуба бэстибээлигэр биллэр-көстөр Кытай, Бурятия, Саха сирин ансамбллара кэлэн, олус киэҥ таһымнаахтык кыттыбыттар. Манна кыттан, биллэр артыыстары, атын ансамбыллар талааннарын көрөн, истиҥ сыһыаны, дойдуга бэриниилээх буолууну билэн, өйдөөн, санаалара сырдыгынан сыдьаайбыт. Бу бэстибээл оҕолор өйдөрүгэр-санааларыгар саамай сырдык, кыраһыабай өйдөбүл буолан сылдьыа.
Сырыы программата эмиэ олус интэриэһинэйдик тэриллибит. Оҕо эрэ барыта баҕарар Universal Park уонна Disneyland паркаларыгар сылдьан, умнуллубат түгэннэри, үтүө өйдөбүлү ыллылар. Саамай улахан суолталаах сырыыбытын тэрийиигэ Viva-Tour туристическай компания улахан көмөнү оҥорон, күүс-көмө буолбута буолар. Viva-Tour компания көмөтүнэн оҕолор бэстибээлгэ ситиһиилээхтик кыттан, төрөөбүт дойдуларын аатын өрө туппуттар.
Татьяна Олесова, Дьокуускай куорат 17 №- дээх орто оскуола 10 «В» кылаас үөрэнээччитэ