Сэрии ыараханын этинэн-хаанынан билбит, кыайыыны уһансыбыт киһинэн мин аймаҕым Васильев Георгий Иванович буолар.
Кини 1917 сыл муус устар 23 күнүгэр Сунтаар оройуонун Хочо нэһилиэгэр күн сирин көрбүтэ. 1925 сыллаахха оскуолаҕа үөрэнэ киирбитэ уонна, оскуоланы бүтэрээт, Аҕа дойду улуу сэриитигэр ыҥырыллыар диэри бухгалтерынан үлэлээбитэ. 1943 сыллаахха сэриигэ ыҥырыллан барбыта. Арҕааҥҥы фронт тимир суол полкатыгар 1 рота 5 батальонугар сулууспатын саҕалаабыта. Бу батальоҥҥа 1945 сыл балаҕан ыйыгар диэри сулууспалаабыт. Берлин таһыгар ыараханнык бааһыран, госпитальга сытан өр эмтэнэн, 1947 сыллаахха төрөөбүт Сунтаарыгар эргиллэн кэлбитэ. Дойдутугар кэлэн үтүө суобастаахтык статистика салаатыгар участковай инспекторынан үлэтин саҕалаан старшай инспекторга тиийэ үүммүтэ. 1977 сыллаахха биэнсийэҕэ тахсыбыта. Хорсун буойун элбэх мэтээл, Аҕа дойду сэриитин 1 истиэпэннээх орден кавалера. 1991 сыллаахха ыарахан ыарыыттан олохтон туораабыта.


21-с үйэҕэ олорор-үлэлиир дьоҥҥо киһини туоһулуур докумуоннар бааллара кими да сөхтөрбөт. Холобур, паспорт, төрөөбүтүҥ туһунан сибидиэтэлистибэ, студенческай билет уонна да атыттар. Оттон урукку сыллары ылан көрдөххө нэһилиэнньэ улахан араҥата киһини туоһулуур докумуона суох олорбут эбит. Холобур, холкуостаахтар паспорт диэни 50-с сылларга эрэ ылбыттар. Архивнай докумуоннары хаһан көрдөххө, Аҕа дойду Улуу сэриитин кэмигэр сулууспалыы сылдьааччылар кинини туоһулуур докумуона суох сылдьыбыттар эбит.
Киһи сөҕүөн курдук красноармеецтар уонна младшай командирдар 1942 сыл ортотугар диэри кинилэри туоһулуур докумуоннара суох эбит. Ол эрээри хас биирдии сулууспалааччы «өлүү медальоннаах» (смертный медальон), пластмасса цилиндргэ бэйэлэрин тустарынан икки лиис кумааҕыга суруйан угаллар эбит. Бу медальоннары 1925 сыллаахха аан бастаан нуучча армиятыгар киллэрбиттэр. Сулууспалааҕы туоһулуур докумуону 1942 сыллаахха биирдэ киллэрбиттэр.
Мин кэпсиир экспонатым – армеец Васильев (Пахомов) Георгий Иванович киниискэтэ. Бу киниискэҕэ киирэр эбит:
Толору аата-суола, ханна сулууспалыыра, байыаннай идэтэ, үөрэҕэ, омуга, төрөөбүт сыла, хаһан ыҥырыллыбыта, төрөөбүт сирэ, олорор аадырыһа, туох таҥас-сап, сэп-сэбиргэл бэриллибитэ, ханна сэриилэспитэ.


Хас биирдии саллаат бу киниискэтин илдьэ сылдьара булгуччулаах, суох буоллаҕына тутуллар диэн сурулла сылдьар.
Бу киниискэни биһиги харыстаан, бүөбэйдээн Улуу Кыайыы 80 сылын көрсө илдьэ кэллибит. Өссө да уһун үйэлэргэ күндү киһибит кэриэһин чиэстээхтик толорон, үлэ, үөрэх чыпчаалын дабайан, үтүө үгэстэри салҕыы, үксэтэ туруохпут.
Ярослав Васильев, 6 кылаас үөрэнээччитэ,
Б.Н. Егоров аатынан Күндэйэ орто уопсай үөрэхтээһин оскуолата,
Сунтаар улууһа.