Тыа уонна киин сир оскуолаларын тэҥнээтэххэ
Атырдьах ыйынааҕы сүбэ мунньахха Ил Дархан Айсен Николаев этиитин ырытан көрдөххө, кырдьык, тыа уонна киин сир оскуолалара кэккэ уратылаахтар.
Киин сиргэ билиини биэриигэ ордук болҕомтону уураллар. Ол гынан баран “талыллыбыт”, ситиһиилээх, кыахтаах оҕолорун эрэ кытта үлэлииллэр. Атын араҥа “сиппэтэҕинэ”, онно олорон хаалар. Кылаастара элбэх оҕолоох.
Кытыы сир оскуолаларыгар барыларын кытта үлэлии сатыыллар, онон кыахтаах оҕо ситэ “арыллыбакка” хаалар. Онон олимпиадаҕа көрдөрүүтэ мөлтөх буолар. Ол аата ылыахтаах билиитин ситэ ылбат буолан тахсар.
Оҕо билиитин таһыма мөлтөөһүнүн биир сүрүн биричиинэтинэн, мин санаабар, эдэр учууталлар үөрэх дьылын ортотуттан декретнэй уоппускаҕа барыылара буолар. Үөрэххэ охсуулааҕа диэн, кинилэр оннуларыгар атын учуутал дэбигис көстөрө ыарахан буолар. Онон элбэх уруок көтүтүллэр, үөрэх ситимэ быстан хаалар.
Тыа сиригэр ыарахаттар ханна барыахтарай? Киин сиргэ холоотоххо, бааллар буоллаҕа! Холобур, эдэр учууталлар тыа сирин усулуобуйатын ыарырҕатан, түптээн үлэлээбэттэр, баран хаалаллар. Мин учууталлар мунньахтарыгар этиллибит «Арктика учуутала» бырагырааманы сэргээтим. Эдэр испэсэлиис тыа сиригэр кэлэн олохсуйан үлэлээтэҕинэ, араас идиэйэни, саҥа сүүрээни киллэриэ этэ. Университет ити бырагыраамаҕа эппиэттиир кадрдары бэлэмниэхтээх.
Мунньахха этиллибит санаа, туруоруллубут сыал-сорук, былааннаммыт бырайыак, биһиги билиибит хаачыстыбата үрдүүрүн туһугар, олоххо киирэллэригэр баҕарыам этэ.
Анжелика Егорова, VIII кылаас.
Билиҥҥи үөрэнээччилэр — кэлин бүтүн өрөспүүбүлүкэни салайыахтаах дьон
Ил Дархан этиитигэр үөрэх хаачыстыбата элбэхтик ахтыллар. Кырдьык, кэлин бүтүн өрөспүүбүлүкэни салайыахтаах дьон, билиҥҥи үөрэнээччилэр, билиилээх-көрүүлээх буолаллара — олох ирдэбилэ. Мин Күүкэйим оскуолата аныгы ирдэбилгэ толору эппиэттиир. Ол курдук, оскуолабыт таас, кэбиниэттэр толору хааччыллыылаахтар, спорт саала, остолобуой , бибилэтиэкэ –барыта баар.
Ол эрээри, кинигэнэн толору хааччыллыы итэҕэс, көрдөрөр матырыйаал тиийбэт, түргэн Интернет суох. Эдэр учууталлар аҕыйах буоланнар, каадыр боппуруоһа эмиэ турар. Маны таһынан, нэдиэлэ аайы билиини хаҥатар оонньуу, араас тэрээһин ыытыллара буоллар.
Валентин Прокопьев, X кылаас.
Олимпиадаҕа айан ороскуота төлөнүөхтээх
Ил Дархан атырдьах ыйынааҕы сүбэ мунньахха үөрэх хаачыстыбатын үрдэтэр наадалааҕын туһунан эппитэ саамай сөптөөх. Оҕо талаанын сайыннарарыгар үчүгэй усулуобуйаны тэрийиэххэ наада. Россия, өрөспүүбүлүкэ таһымнаах олимпиадаларга барар айан ороскуота төлөнүөхтээҕин истэн, олус сэргээтим. Оччотугар үөрэнээччи үөрэҕэр өссө күүскэ кыһаллыа, элбэҕи ситиһиэ дии саныыбын.
Биһиги, оскуола лидердара, оҕо үөрэҕэр кыһалларын туһугар күүскэ үлэлиэхтээхпит. Хас биирдии оҕо оскуола араас куруһуогар сылдьарын ситиһиэхтээхпит. Оччоҕо спорт, иис-уус, ырыа-үҥкүү эйгэтигэр оскуола чиэһин көмүскүүр оҕолор элбиэхтэрэ. Билиҥҥи кэмҥэ үөрэхтээх, идэлээх, үчүгэйдик төлөнөр үлэлээх эрэ киһи олоҕор көмүскэллээҕин өйдүөх тустаахпыт. Ол иһин кыһаллан туран үөрэниэхтээхпит. Хас биирдии оҕо, куоратыттан, тыатыттан тутулуга суох, чиҥ билиини ылыахтаах. Хаачыстыбалаах үөрэхтэн билиигэ тардыһыы күүһүрэрин бары өйдүөхтээхпит.
Лиза Кычкина, IX кылаас,
“Кустук” пост эдкордара.
Күүкэй, Сунтаар.
