Оскуолабытыгар «Күһүҥҥү дьаарбаҥка» ситиһиилээхтик ааста. Тэрээһиҥҥэ оскуола оҕолоро бары көхтөөхтүк кыттыыны ыллылар. Хас биирдии кылаас үөрэнээччилэрэ остуолларын бэйэлэрэ астаабыт астарынан киэргэтэн, атыылаатылар.
Учууталлар, төрөппүттэр, оҕолор уонна нэһилиэк олохтоохторо кэлэн, оҕолор бэйэлэрэ оҥорбут астарын атыылаһан, үөрэн-көтөн тарҕастылар. Оҕолор бэйэлэрин тиэргэннэригэр үүннэрбит оҕуруот астарыттан араас үчүгэй бүлүүдэлэри оҥорбуттар, Хадаар тыатыттан хомуйбут отоннорун барыанньалаан, пирог оҥорон атыылаан кылаастарыгар харчы киллэрдилэр.
Бу күн оҕолор тыыннаах алтыһыы, хардарыта көмөлөһүү, ыалдьытымсах буолуу уонна хамаандаҕа үлэлээһин үөрүйэхтэрин сайыннардылар. Бастакы, иккис, үһүс кылаас оҕолоро атыы-эргиэн туһунан бастакы өйдөбүллэрин иҥэриннилэр. Онтон дьаарбаҥкаҕа бэлэмнэнии оҕолор, төрөппүттэр уонна учууталлар икки ардыларыгар сибээһи бөҕөргөттө. Оскуола активын оҕолоро дьаарбаҥка киэргэтиитигэр көмөлөстүлэр, дьаарбаҥкаҕа кэлбит дьоҥҥо махталларын биллэрэн эҕэрдэ нүөмэр туруордулар.
Дьаарбаҥкабыт олус бэһиэлэйдик, сэргэхтик уонна үчүгэй санаанан ааста. Бэйэ-бэйэҕэ истиҥ сыһыан эйгэтин бэлэхтээтэ. Оҕолорго да, улахан да дьоҥҥо умнуллубат өйдөбүллэри хаалларда.
Алена КСЕНОФОНТОВА, X кылаас,
С.Д. Флегонтов аатынан Хадаар орто оскуолата, Чурапчы