Амма улууһа «Чуораанчык» оҕо сурунаалын редакциятын кытта үлэлэһэн, VII спортивнай оонньуулары көрсө алтыс нүөмэрэ таҕыста. Сурунаал сүрэхтэниитэ спорт оонньууларын кэмигэр буолуоҕа. Дьэдьэн барыанньата сурунаал оонньуутун кыайыылааҕар тиксиэ.
Амма улууһун дьаһалтата «Чуораанчык» оҕо сурунаалын редакцията кытта бииргэ үлэлэһэн VII спротивнай оонньуулары көрсө 16 сирэйдээх сурунаал алтыс нүөмэрэ таҕыста. Бу бырайыагы сурунаал эрэдээктэрин солбуйааччы, биир дойдулаахпыт Сардана Матвеева, баһылыгы социальнай боппуруостарга солбуйааччы Иванна Шишигина, О.П.Иванова — Сидоркевич аатынан оҕо айар сайдар киинин дириэктэрэ Иванна Шестакова уонна В.И.Жожиков аатынан Амматааҕы оҕо бибилэтиэкэтин сэбиэдиссэйэ Прасковья Ефграфова салайаннар бөлөхтөр тиэмэлэринэн үллэстэн үлэлээтилэр.
Сурунаал сирэйин Николай Рязанскай «Амма өрүскэ» хартыыната киэргэттэ. Амма улууһун устуоруйата, биллиилээх спортсменнара, ааттаах-суоллаах дьонун туһунан оҕолор суруйуулара, кинилэр мэтириэттэрин уруһуйдаабыт Туймаада Сивцева — Захарова, кэрэни хоһуйар худуоһунньуктар Николай Рязанскай уонна Дария Олесова — Татаринова, «Амма айылҕатын харыстыахха» плакат уруһуйдара оҕолор болҕомтолорун тардыахтара. Айар талааннаах Зинаида Архипова, Екатерина Сидорова, Дария Васильева — Амма Даайыс оҕолорго анаабыт суруйууларын сэргэ, оҕолор хоһооҥҥо холонууларын ааҕыаххыт. Сулҕаччы орто оскуолатын иккис кылааһын салайааччыта Дария Христофорова «Амма устун айан» диэн остуол оонньуута интэриэһинэй буолбут. Манна кыайбыттар бу кылаас оҕолорун аатыттан дьэдьэн барыанньатын кэһии быһыытынан тутуохтара. Улуус баһылыга Николай Архипов уонна үөрэх салаатын начаалынньыга Юрий Шишигин оҕолорго туһаайбыт сорудахтара киирдилэр. Сурунаалга улуус оҕолорун ситиһиилэрин эмиэ сырдаттылар.
Сурунаал сүрэхтэниитэ Аммаҕа оонньуулар кэмнэригэр от ыйын 4 күнүгэр буолуоҕа. Манна муус устар ыйга биллэриллибит «Амма оҕо хараҕынан» диэн күөн күрэс кыайыылаахтара наҕараадаланыахтара. Кыайыылаахтар үлэлэрэ сурунаалга бэчээттэннилэр.
Ааптар: Алтана Артемьева, ulus.media