Муус устар 11 күнүгэр Мукучуга И.Е. Левин аатынан Танара агрооскуолатыгар тыа хаһаайыстыбатын наукаларын доктора, профессор, суруйааччы, суруналыыс Афанасий Васильевич Чугунов аатынан научнай-практическай конференцияҕа кыттан кэллибит.
Бу сырыыга хас да секцияҕа кытынным. Ол курдук дойдубутугар үүнэр элбэх сүлүһүннээх үүнээйилэр тустарынан дакылааппынан “Ветеринария” секциятыгар кыттан иккис миэстэ буоллум. Маннык үүнээйилэр бастатан туран ынах сүөһүгэ кутталлаахтар. Онон биологическай куттал суох буолуута диэн өйдөбүл баарын биллим. Бу секцияҕа учуонайдар сэргээн истэн элбэх туһалаах сүбэ биэрдилэр. Олеся Неустроевалыын суруйбут соботтон паштет оҥоруу туһунан үлэбитинэн «Экономика» секциятыгар бастакы миэстэ буоллум.
Биир кылааска үөрэнэр Сайаана Левина сэлиэһинэй бурдугуттан аһытыыга дьиэҕэ астааһын көрүҥнэрин туһунан үлэтинэн анал аатынан бэлиэтэннэ. Үөрэ оттоох сахалыы лэппиэскэ, блины, синнабон астаан илдьэн үлэтин ситэрэн көрдөрдө.
Арчын Терехов төрүччүтүн үөрэтэн быйылгы үөрэх дьылыгар араас конференцияларга ситиһиилээхтик кытынна. Хос-хос эһэтэ А.С. Терехов-Охоой Кэбээйигэ бастакы тыа хаһаайыстыбатын саҥалыы тэрийсибит эбит. Ол курдук ТОЗ (товарищество по обработке земледелия), «Калинин»аатынан колхуос кини салалтатынан тэриллибиттэр. Колхуоска уонна 1961 c. тэриллибит сопхуоска хос эһэтэ В.А. Терехов араас үлэҕэ өрүү бастыҥнар кэккэлэригэр сылдьыбыт. Бу үлэтинэн Арчын Терехов үһүс миэстэ буолла. Люба Максимова (9А) “Айылҕа” лааҕырга моркуобу үүннэриини чинчийбит дакылаатынан тыа хаһаайыстыбатын үүнээйилэрин секциятыгар бастакы степеннээх дипломунан наҕараадаланна.
Дакылааттарбытын ааҕан баран собоҕо сыһыаннаах куонкуруска кыттан оскуолабыт «Умсан» хамаандата кыайыылаах буоллубут.
Маннык конференция биллиилээх дьоммут олохторун уонна үлэлэрин билсэрбитигэр, холобур оҥосторбутугар анаан тэриллэр. Афанасий Васильевич Чугунов эдэр дьоҥҥо анаабыт кэс тылын өйдүөхэйиҥ: «Дьулус, таптаа, харыстаа, үлэлээ, сүбэлэс, идэлэн, дьиҥи тутус, билиилэн, өйдөө, ай, итэҕэй, тардын, эрэн, ыал буол, кэрэҕэ дьулус, киһини көмүскээ, былааһы былдьаһыма, сахабын дэн, дьолго дьулус, үрдүккэ талас, хайҕалы ситис!», — бу сахам ыччатыгар туһаайан этэр кэс тылым».
Карина Обутова, 10 кылаас, «Нуклеус» пост, Кэбээйи оскуолата