Өрөспүүбүлүкэ 100 сылыгар анаан «Айыы Кыһата» гимназияҕа тиһигин быспакка үөрэнээччи — учуутал — төрөппүт кыттыылаах араас бырайыактар олоххо киирэллэр.
Алтынньы 8 күнүгэр «Айыы Дайар» тэлгэһэтигэр «Туллуктары көтүтүү» арт-бырайыак арыллыыта буолан ааспыт. Бырайыак ааптардара — 5-8 кылаас уолаттара. Технология учуутала Виталий Архипович Слепцов салалтатынан саас саҕалаабыт айымньылаах үлэлэрин түмүгүн айыы санааны олохсутан учууталларга анаатылар.
1925 сыл алтынньы 8 күнүгэр, 97 сыл анараа өттүгэр, Дьокуускай үрдүнэн аан бастакы көтөр аал дайбыт, көппүт күнэ. Онно бастакы үс пассажирдартан биирдэстэрэ Платон Алексеевич Слепцов — Ойуунускай эбит.
Онон «Туллуктары көтүтүү» сүдү суолталаах күҥҥэ түбэспит. «Өрөспүүбүлүкэни турууласпыт Ытык дьоммут айыы санааларын салгыыр, сайыннарар, дьон-норуот туһугар бэйэлэрин аналларынан олоххо киллэрэр кыахтаах ыччаты бэлэмнээһин — биһиги ытык иэспит», — диэн үллэстэр учуутал Лидия Петровна Шамаева.
keskil14.ru