Бүгүн, сэтинньи 13 күнүгэр, Саха Өрөспүүбүлүкэтин Бастакы Бэрэсэдьиэнэ Михаил Ефимович Николаев төрөөбүт күнүн бэлиэтиибит. Бүгүҥҥү күн хас биирдии саха киһитигэр суолталаах, бэлиэ күн. Бу күн биһиги Михаил Ефимович оҥорбут өҥөтүн, күүстээх үлэтин, норуотугар уонна дьонугар-сэргэтигэр анаабыт сыратын күндүтүк саныыбыт.
Михаил Ефимович Николаев Саха сирин үөрэхтээһинэ уонна науката саҥа кирбиилэргэ тахсарын, төрүт тылбыт уонна култуурабыт сайдарын туһугар турууласпыта, Кини эдэр ыччаты өйүүрэ, дойдубутугар саҥа тыыны уонна сүүрээни киллэрэр иһин элбэх үлэни анаабыт киһинэн буолар. Кини айбыт, оҥорбут идиэйэлэрэ күн бүгүнүгэр диэри тыыннаахтар, олус элбэх киһи өйүгэр-санаатыгар билигин да бааллар.
Биир оннук сүрүн кини хаалларбыт нэһилиэстибэтинэн «Знанием победишь» диэн Судаарыстыбаннай Стипендия буолар. Бу стипендияны Михаил Ефимович 2002 сыллаахха олоххо киллэрбитэ. Стипендия сүрүн сыалынан-соругунан эдэр кэскиллээх оҕолору өйөөһүн, учууталлар уонна наставниктар үтүө үлэлэрин сыаналааһын буолар.
Бүгүн Михаил Ефимович Николаев үтүө үлэтигэр сүгүрүйэбит, кини оҥорбут өҥөтүн харыстыыбыт уонна ааттатабыт. Кини эдэр ыччакка, үүнэр көлүөнэҕэ холобур буолар, кини Саха сирин сайыннарбыт үтүө кылаата биһигини кынаттыыр, инникигэ сирдиир!
Кэскил14.ру