Ахсынньы 6 күнүгэр Данил Степанович Слепцов аатынан Эбээх орто оскуолатыгар үгэскэ кубулуйбут «Аһын, таптаа кэрэни» бэстибээл буолан ааста.
Тэрээһин Дьиэ кэргэн, Оҕо сылыгар ону тэҥэ Улуу Кыайыы 80 сылыгар ананар. Бэстибээл 1980-1998 сылларга элбэх оҕону ахсаан, муусука уруогар үөрэппит республикаҕа биллэр ырыа айааччы биһиги киэн туттар учууталбыт Николай Данилович Тимофеев аатын үйэтитэр сыаллаах-соруктаах быйыл 22-с сылын ыытылынна.
Бу бэстибээл саҕалааччыларынан Арассыыйа Федерациятын үөрэҕириитин бочуоттаах үлэһитэ, саха тылын уонна литературатын учуутала Евдокия Ефимова, Саха Республикатын үөрэҕириитин туйгуннара нуучча тылын уонна литературатын учуутала Елена Слепцова уонна төрүт культура учуутала Николай Гуляев буолаллар.
Күрэххэ оскуола үөрэнээччилэрэ 3 бөлөххө арахсан, 9 көрүҥҥэ талааннарын көрдөрдүлэр. Ол курдук: соло уонна ансаамбыл ырыаҕа, пааранан үҥкүү, төрөппүтү кытта нүөмэр, фольклор, ыытаччылар икки ардыларынан күрэх, Кыайыы сылыгар аналлаах уус-уран ааҕыы уонна бөлөх үҥкүүтэ, ону кытары музыкальнай инструмеҥҥа оонньооһун.
«Аһын, таптаа кэрэни» бэстибээл кэрэҕэ, үтүөҕэ тардар, оҕону культура эйгэтигэр угуйар, талааннын арыйан инникитигэр олук уурар. Бу дьоро киэһэҕэ саҥа, сэргэх нүөмэрдэр, саҥа ааттар, талааннар тахсан көрөөччүлэри да, төрөппүттэри да үөртүлэр. Быйыл саҥа сүүрээн киирэн оҕолор тыыннаах доҕуһуолунан ыллаан иһитиннэрэн дьон биһирэбилин ыллылар.
Дьүүллүүр сүбэ кыайыылаахтары быһаарда. Анал ааттар хаһаайыттара буоллулар:
− соло ырыа — Слепцова Элла, 1 кылаас үөрэнээччитэ «Ийэбэр»;
− бөлөҕүнэн ырыа толоруутугар – улахан бөлөх уолаттара «Халыма уола»;
− паараннан үҥкүүгэ — Алена Тырылгина уонна Тамир Гуляев «Ёхор»;
− бөлөх үҥкүүтүгэр – алын кылаас кыргыттара «Отмените войну!»;
− фольклорга — алын кылаас кыргыттара «Чабырҕах»;
− музыкальнай инструмеҥҥа онньооһуҥҥа – орто бөлөх оҕолоро ВИА «ИМБА»;
− уус-уран ааҕыыга – 8-с кылаас коллектива «На землянке»;
− төрөппүтү кытта нүөмэргэ — улахан бөлөх кыргыттара ийэлэрин кытта «Журавли» уҥкүү;
− ыытааччылар икки ардыларыгар – 4-с кылаас үөрэнээччитэ Сергучева Эмилия.
Үгэс буолбут сылын аайы ыытыллар «Аһын, таптаа кэрэни» бэстибээл кынат ылан талааннара сайдар, кэрэҕэ үтүөҕэ тардыһыылара үрдүүр диэн бүк эрэллээхпит.
Кыайыылаахтары өссө биирдэ эҕэрдэлиибит, бары кыттааччыларга, үөрэнээччилэргэ, салайааччыларга, дьүүллүүр сүбэҕэ, төрөппүттэргэ уонна Уйбаан Учуунускай аатынан культурнай киин бары үлэһиттэригэр махталбытын тиэрдэбит!
Анжела Третьякова,
VIII кылаас,
Эбээх, Орто Халыма