И.М. Яковлев аатынан Покровскай 1 №-дээх орто оскуолата 2015 сыллаахтан Монголия Чингэлтэй куорат 61 № оскуолатын кытта алтыһар, доҕордоһор. Бу сыллар тухары икки оскуола араас култуурнай, үөрэх программанан опыт атастаспыттара, кэнсиэртэри туруорбуттара. Биһиги «Хаҥаласчаан» үҥкүү ансаамбылбыт оҕолоро Сахабыт сирин култууратын, үҥкүүтүн, хомуһун иһитиннэрэн, көрдөрөн кэлбиттэрэ, оттон монгол доҕотторбут харда курдук эмиэ Сахабыт сиригэр хаста да ыалдьыттаан, араас элбэх тэрээһиннэргэ, кэнсиэртэргэ кыттыбыттара, ыһыахха, Өлүөнэ остуолбаларыгар сылдьыбыттара.
Бу күннэргэ ол Чингэлтэй оскуолатын бүтэрбит икки үөрэнээччи, билигин Арктикатааҕы култуура уонна искусство судаарыстыбаннай институтун устудьуоннара Оргилбаяр Нямжав уонна Батхуу Уянга биһиги оскуолабытыгар кэлэн «Хаҥаласчаан» үҥкүүһүт уолаттарыгар монгольскай үҥкүүлэри үөрэтэн бардылар. Ону таһынан улахан кылаас үөрэнээччилэригэр үөрэхтэрин туһунан кэпсээтилэр уонна саха остуол оонньууларыгар хабылыкка, хаамыскаҕа үөрэннилэр. Бэйэлэрин биир дойдулаахтарын, Покровскайга олорор Илиҥҥи бойобуой искусство көрүҥэр оҕолору дьарыктыыр монгол тренерын Гансух Шагдары кытта көрсөн кэпсэттилэр, дойдуларын ахтыстылар.
Дириэктэрбит Спиридон Спиридонович устудьуон уолаттарга махтал сурук уонна хабылык, хаамыска бэлэх туттарда. Ити курдук саха уонна монгол норуоттар икки ардыларыгар доҕордоһуу салҕанар.
Анжела Жиркова, X «Б» кылаас, И.М. Яковлев аатынан Покровскай 1 нүөмэрдээх орто оскуолата