«Саха КВН-ныын аргыстас,үрдүккэ, кэрэҕэ талас»
(Михаил Охлопков, «Күн тахсыыта» КВН хамаандата).
Саха Өрөспүүбүлүкэтигэр «Саха КВН» баар буоларыгар, олоххо бигэтик киирэригэр улахан болҕомтотун ууран сайыннарбыт киһинэн Саха өрөспүүбүлүкэтигэр «Лига Саха КВН» эдэр ыччат уопсастыбаннай тэрилтэтин бэрэссэдээтэлэ Геннадий Иванович Охлопков буолар. Кини суруйбут «Саха КВН: өйдөбүлэ, ис хоһооно, иитэр суолтата, историята» кинигэтигэр (методическай ыйынньыкка) КВН туһунан киэҥник ырытан суруйбута салайааччыларга уонна оҕолорго улахан көмө буолла. Кинигэҕэ суруллубутунан: «КВН – эдэр дьон оонньуута, түмсэр сирэ. Биһиэхэ КВН сайдыыта икки хайысхалаах: оскуола саастаах оҕолорго уонна ыччакка (устудьуоҥҥа) анаан. Салалта үгүс болҕомтону оскуола оҕолорун КВН-ыгар уурар. Ол сүрүн төрүөтүнэн КВН иитэр уонна үөрэтэр күүһэ буолар. КВН-ҥа культура уонна искусство бары кэриэтэ жанра хабыллар буолан, оҕону үгүс өттүттэн сайыннарар, иитэр, үөрэтэр кыахтаах…».
Биһиги ити хайысханы табатык өйдөөммүт улууспутугар оҕо тэрилтэлэригэр биир сүрүн хайасханан киллэрэммит 2010 сыллаахтан КВН-ныын бииргэ сайда сылдьабыт. Элбэх көлүөнэ оҕо «Саха КВН-ны» сөбүлээн дьарыктанна, салгыы оскуоланы бүтэрэн куоракка үөрэххэ бардахтарына даҕаны, КВН-ны кытта син биир бэйэлэрин баҕаларынан оонньууллар, ситим быстыбат. КВН-ҥа оҕолор оонньуу үөрэнэллэригэр, КВН туһунан өйдөбүл ылалларыгар Геннадий Иванович Охлопков хамаандатын кытта улуус оскуолаларын хамаандаларын биир сиргэ түмэн Саха КВН үөрэҕин ыыталлар, коммунарскай сборга мунньан тэрийэн оонньотоллор. Кэрэхсэбиллээҕэ диэн бу сэргэх хамсааһыны үгүс оскуола, оҕо тэрилтэлэрин салайааччылара сөпкө өйдөөтүлэр уонна өйөөтүлэр, педагогтар уонна төрөппүттэр интэриэстэрэ сыллата дириҥээн иһэр.
Быйыл оҕолорбутугар «Саха КВН» улуустааҕы күрэҕин олунньу ыйга тэрийэн ыытарга былааннаммыппыт. Оонньуу үрдүк таһымнаахтык ааһарыгар эрдэттэн оскуола хамаандаларын бэлэмнииргэ сорук турбута. Ол иһин Геннадий Ивановиһы кытта сүбэлэһэн олунньу 27-28 күннэригэр ыытыахха диэн буолбута. Ол чэрчитинэн үгүс сыллар тухары «Дьүлэй дьээбэлэрэ» диэн улууска, өрөспүүбүлүкэҕэ инники күөҥҥэ сылдьыбыт хамаандалаах Туора-Күөл орто оскуолатын баазатыгар “Биир күннээх Саха КВН оскуолата” үрдүк таһымҥа тэриллэн ааста. Бу тэрээһин ыытылларыгар оскуолатыгар көҥүллээн “Саха КВН” хамсааһына сайдарын табатык ылынан төһүү күүс-көмө буолбут ытыктабыллаах салайааччыга Оксана Николаевна Гуляеваҕа улаханнык махтанабыт!
“Биир күннээх Саха КВН оскуолата” 11 оскуолаттан 130 оҕону түмэн «Саха КВН» сүрүн соругун – саха тылын баайын ыччакка төнүннэриигэ, сахалыы КВН-ҥа кыттар оҕолортон кэнэҕэс сытыы, тобуллаҕас толкуйдаах, сахалыы сайдам тыллаах-өстөөх, омук бастыҥ баайын иҥэринэ сылдьар дьон үүнэн-силигилээн тахсалларыгар олук ууран, хамаанда түмсүүлээх эрэ буоллаҕына, оонньуу үрдүк таһымҥа барарын өйдөтүү буолла. Бу Саха КВН туһунан кэпсээн-ипсээн, бэйэлэрин баай уопуттарын бэрсэн, оҕолору өрө көтүтэн оонньотон, биир тыыҥҥа киллэрэн өрөспүүбүлүкэ тутаах оонньооччулара Евгений Филиппов, Рудольф Макаров, Айтал Егоров, Айаал Морхоев наһаа астыктык ыыттылар. Уолаттарга үөрэхтэригэр улахан ситиһиилэри, айымньылаах үлэни баҕара хааллыбыт.
Дьэ, бу үөрэх кэнниттэн олунньу ыйга ыытыллар “Саха КВН” күрэҕэ элбэх оҕону хабан, сахалыы тылбытынан сайа саҥаран дьону үөрдэн истиҥ сыһыаҥҥа, үрдүк таһымҥа ыытыллыа диэн баҕа санаалаах хааллыбыт.
Матрена Алексеева,
Тааттатааҕы «Сатабыл» оҕо айымньытын дьиэтин педагог-организатора.