Соболоох орто оскуолатыгар, физкультура учуутала А.П. Кучаров көҕүлээһининэн, Муома оройуонугар бастакы спортивнай лааҕыр 10 күн устата таһаарыылаахтык үлэлээтэ. Бу лааҕырга Индигир оскуолатыттан 10 оҕо эрчиллэн кэллилэр. Сарсыарда өттүгэр уруоктарга үөрэнэн билиилэрин чиҥэттилэр. Салгыы араас хайысханан күүстээх дьарыктаныыны аастылар. Ону таһынан, баһаатайдар оонньуу, аһаҕас кэпсэтии ыыттылар.
Оҕолор билсиһэннэр доҕордостулар, билиилэрин атастастылар. “Өбүгэлэр оонньуулара” күрэххэ 10 уол, 6 кыыс көхтөөхтүк кытыннылар. Тутум эргиир, ыстаҥа, хапсаҕай, мас тардыһыыта, таас көтөҕүүтэ, сүүрүү көрүҥнэригэр күрэхтэһэн, Артём Никулин (VI кылаас) бочуоттаах II миэстэ буолан, үөрэн-көтөн кэллэ. Тутум эргииригэр кыргыттар сымсаларынан сөхтөрдүлэр. Ити курдук, оҕолор эт-хаан өттүнэн сайдан, элбэҕи билэн- көрөн кэллилэр. Оҕолорбут Соболоох оскуолатын учууталларыгар, тренер А.П. Кучаровка, тохтоон ыалдьыттаабыт дьиэ кэргэннэригэр улахан махталларын тиэрдэллэр.
“Сардаана” эдкорпост,
Индигир, Муома.