Оскуола үөрэнээччилэрин Россиятааҕы оҕо хамсааһынна бэйэтин эйгэтин кэҥэтэн, оҕо уонна ыччат Россиятааҕы хамсааһына «Бастыҥнар хамсааһыннара» диэн ааттанна. Билигин бу тэриллибит хамсааһыҥҥа оҕолор 6 саастарыттан саҕалаан, устудьуоннарга тиийэ бары бүтүн Россиятааҕы куонкурустарга, фестивалларга кыттар кыахтаннылар!
Биһиги Семен Дмитриевич Флегонтов аатын сүгэр Хадаар орто оскуолатыгар уопсайа 93 үөрэнээччилэрбит, ол иһигэр оҕо хамсааһынын актыбыыстара, оҕо уонна ыччат Россиятааҕы хамсааһынын бастакы салаатын оскуолабытыгар тэрийиигэ көхтөөхтүк үлэлээтилэр. Ол курдук, бэрэссэдээтэл, сэкирэтээр талан, наадалаах докумуоннары оҥорон, Саха Республикатын оҕо уонна ыччат Россиятааҕы хамсааһынын регионнааҕы салаатыгар сөбүлэҥҥэ ыыттылар. Саҥа сылга саҥа былаанынан, көрүүлэринэн иннилэрин диэки барарга бэлэмнэр!
2023 сылга «Бастыҥнар хамсааһыннара» саҥа хамсааһыҥҥа кыттыһар кэммит кэллэ! Манна саамай интэриэһинэй бырайыактар үлэлэрин салгыахтара уонна оҕо сайдыытыгар элбэх тэрээһиннэр тэриллиэхтэрэ.
Хадаар орто оскуолатын актыбыыстара.