Сэтинньи 18 күнүгэр Баппаҕаайы нэһилиэгэ төрүттэммитэ 105 сылын, ССРС Норуодунай учуутала Михаил Андреевич Алексеев 105 сааһын уонна Саха Өрөспүүбүлүкэтигэр физкультурнай хамсааһын 100 сылын бэрт тэрээһиннээхтик ыытылынна.
Баппаҕаайы нэһилиэгэ – Бүлүү улууһун киирэр аана, саҥаны-үтүөнү көҕүлүүр, үлэни-хамнаһы кыайа-хото тутар дьоннордоох биир улахан нэһилиэк.
Лөкөчөөн уонна Баппаҕаайы нэһилиэктэрин олохтоохторо “Нэһилиэк күнүн” үөрэ-көтө, өрө көтөҕүүлээхтик бэлиэтээтилэр.
Үөрүүлээх тэрээһиҥҥэ, биһиги биир дойдулаахпыт, ыалдьыппыт Саха АССР Министирдэрин Сэбиэтин иһинэн спорткомитет 1977 – 1986 сс. бэрэсэдээтэлэ, орто дистанцияларга сүүрүүгэ 17 төгүллээх чемпиона, Сибиир уонна Дальнай Восток 4 төгүллээх чемпиона. РСФСР СССР чемпионаттарын призердара, СӨ норуотун хаһаайыстыбатын үтүөлээх үлэһитэ, Бүлүү уонна Муома улуустарын бочуоттаах гражданина, “Арассыыйа потребительскай кооперациятын сайдыытыгар үтүөтун иһин” уордьан уонна СӨ” Гражданскай килбиэн” бэлиэ кавалердара, Афанасий Егорович Алексеев салайааччылаах делегация кыттыыны ылла:
Мохначевскай Гаврил Михайлович — СӨ спортка уонна физкультураҕа министерствотын миниистирин солбуйааччыта.
Оконешников Роман Иванович – физическай культура уонна маассабай спорт салалтатын салайааччыта.
Афанасьева Зинаида Егоровна– физическай культура уонна маассабай спорт физкультурнай-чэбдигирдэр салаатын салайааччыта.
Оконешников Дмитрий Евдокимович — физическай культура уонна маассабай спорт тэрийэр отделын салайааччыта .
Посельский Василий Федорович — спортивнай журналист.
ЗахаровПетр Сменович– Берлиҥҥэ, Чикагоҕа, Бостоҥҥа ыыттыллыбыт марафон кыттыылааҕа.
Тэрээһини ситэрэн –хоторон биэрдилэр Бүлүү улууһун делегациялара:
Евсеев Иван Иванович – Бүлүү улууһун баһылыгын бастакы солбуйааччыта.
Евсеев Гаврил Степанович — улуустааҕы спорткомитет председателэ.
Львова Валентина Егоровна –улуустааҕы спорткомитет ведущай специалиһа.
Александра Хабытчарова — НВК «Саха» Бүлүүтээҕи филиал.
Тэрээһин бастакы чааһа оскуола үөрэнээччилэрин, учууталларын кытта көрсүһүүттэн саҕаланна. Оскуола коллектива сахалыы алаадьынан айах тутан, спортивнай үҥкүүнэн уруйдаан-айхаллаан көрүстүлэр.
Манчаары оонньууларын төрүттээччи, биһиги биир дойдулаахпыт, ыалдьыппыт Афанасий АЛЕКСЕЕВ: «Саха норуота дьоллоох уонна доруобай буолуохтаах. Ол төрдө — спорду, физкультураны батыһыы», — диэн эппитэ элбэҕи толкуйдатар.
СӨ спортка уонна физкультураҕа министерствотын миниистирин солбуйааччыта Гаврил Михайлович оҕолорго спорт туох туһалааҕын, дьарыктанарга араас сүбэлэри – хайысхалары биэрдэ. Оҕолор ыйытыыларыгар эппиэттээтэ.
Василий Посельский спортивнай журналист диэн туох идэний, онно хайдах киһи үлэлиэхтээҕин, ким журналист идэтигэр үөрэнэ барыан баҕарар диэн ыйытан, оҕолортон интервью ылан ордук сэргэхситтэ. Ыалдьыттарбыт оскуола иһин, ордук сэргээн М. А. Алексеевка анаммыт музей залы кѳрдүлэр-иһиттилэр.
Күнүс 2 чаастан улахан ремонт кэнниттэн саҥардыллан оҥоһуллубут ып- ыраас, сып – сырдык “Эрэл” спортивнай саалаҕа Лөкөчөөн уонна Баппаҕаайы нэһилиэгин олохтоохторун, кэлбит ыалдьыттары, Афанасий Егорович сахалыы аал уоту оттон эҕэрдэ сиэрин-туомун толоруутунан көрүстүлэр.
Икки нэһилиэк олохтоохторун, физическай культура уонна маассабай спорт физкультурнай-чэбдигирдэр салаатын салайааччыта Зинаида Егоровна Афанасьева бэрт сатабыллаахтык сааһылаан, зарядка араас хамсаныыларын көрдөрдө, үөрэттэ.Оҕолуун, улаханныын үөрэ –көтө тэҥҥэ хамсаннылар, дуоһуйууну ыллылар.
СӨ спортка уонна физкультураҕа министерствотын миниистирин солбуйааччыта Гаврил Михайлович Мохначевскай олохтоохтору нэһилиэк күнүнэн, спортивнай саала иккис тыыннанан үлэҕэ киирбитинэн эҕэрдэлээн туран, 100 тыьыынча сууммаҕа спортивнай тэрил ыларга сертификат туттарбытын, дохсун ытыс тыаһынан олохтоохтор биһирээтилэр.
Евсеев Иван Иванович Бүлүү улууһун баһылыгын бастакы солбуйааччыта ыччат дьарыктаннын диэн икки пневматическай саа бэлэхтээн, олохтоохтор үөрүүлэрин үрдэттэ.
Элбэх эҕэрдэ, алгыс тыллар этилиннилэр. Саамай кэрэхсэбиллээҕэ уонна кэскиллээҕэ 87 саастаах Афанасий Егорович этиилэрэ буолла. Ол курдук 2018 сыллаахха, төрөөбүт Баппаҕаайытын нэһилиэгин 80 бырыһыанын физкультураҕа сыһыарбыта. Оҕо саадын оҕолоро, оскуолалар, хамнас ылааччылар, бэтэрээннэр булгуччу дьарыктаныахтаахтар диэн сорук туруорбутун өйөөбүттэрэ.
Афанасий Егорович Манчаары оонньууларын төрүттээччи: «Саха норуота дьоллоох уонна доруобай буолуохтаах. Ол төрдө — спорду, физкультураны батыһыы» диэн этиитин биһирээн, ити холобурун өрөспүүбүлүкэҕэ ыҥырыыытынан, 2023 сылга салгыы нэһилиэк 100 % физкультуранан дьарыктаныа диэн этии киллэрдилэр. Олохтоох дьаһалта баһылыга Егор Афанасьевич Николаевы кытта илии тутустулар.
Онтон салгыы икки нэһилиэк спортивнай күрэххэ табаарыстыы көрсүһүү буолла: волейбол, хабылык, хаамыска, дуобакка, саахымакка күрэхтэстилэр, дартска бырахтылар, оҕунан ыттылар. Кыайыылаахтар үөрүү өрөгөйүн биллилэр, сыаналаах бэлэхтэри, мэдээллэри, грамоталары туттулар. Күрэх түмүгэр физическай культура уонна маассабай спорт салалтатын салайааччыта Оконешников Роман Иванович 15 тыһыынча сууммаҕа теннис остуолун ыларга сертификаты дохсун ытыс тыаһыгар туттарда.
Петр Семенович Захаров Берлиҥҥэ, Чикагоҕа, Бостоҥҥа ыыттыллыбыт марафон кыттыылааҕа ыччаттарга, оҕолорго сөпкө сүүрүүгэ маастар – кылаас көрдөрбүтэ олус интэриэһинэй буолла, мэдээллэрин кырачааннар тутан – хабан көрөн сөхтүлэр. биһирээтилэр.
ССРС Народнай учуутала М.А.Алексеев 105 сааһыгар анаан «Сүдү учуутал сахпыт кыымын күөдьутэн» альбом – кинигэ сүрэхтэнэр презентациятын М. А. Алексеев аатынан Баппаҕаайы уопсай үөрэхтээһин коллектива тэрийэн ыытта. Ыҥырыылаах ыалдьыттарбытыгар, тэрилтэ салайааччыларыгар директор Виталий Владиславович Макаров алгыс тыллардаах эҕэрдэни кытта, альбом – кинигэни бэлэх уунна.
СӨ спортка уонна физкультураҕа министерствотын миниистирин солбуйааччыта Гаврил Михайлович Мохначевскай икки нэһилиэк физкультураҕа учууталларыгар, чөл олоҕу коҕүлээччи активистарга грамоталары туттарда. Нэһилиэкпит үлэһит, ситиһиилээх дьоно нэһилиэк баһылыгыттан махтал сурук, грамота туттулар.
Маннык мааны тэрээһини үйэтитэн Василий Посельский, Александра Хабытчарова хас биирдии түгэни хаартыскаҕа, видеоҕа түһэрдилэр, интервью ылан тистилэр.
Бу күн Лөкөчөөн уонна Баппаҕаайы нэһилиэгин олохтоохторо олус сэргэх концерды бэлэхтээн, үөрүүнү-көтүүнү үөксэттилэр. Ити курдук нэһилиэкпит күнэ өрө көтҕүллүүлээхтик, үөрүүлээх быһыыга-майгыга ааста. Нэһилиэк дьоно дуоһуйа сынньаннылар, астыннылар!
Ирина Жиркова , М.А. Алекеев аатынан Баппаҕаайы оскуолатын учуутала,
Илбэҥэ, Бүлүү улууһа.