Эн, мин, кини – атын-атын дьоммут. Ол эрээри биир майгыннаһар өрүттээхпит. Биһиги бары сахалыы саҥарабыт! Сахалыы дорҕоон буукубалара эппитигэр-сииммитигэр иҥэн сылдьаллар.
Саха норуодунай суруйааччыта Н.Е. Мординов-Амма Аччыгыйа аатынан ”Кэскил” оҕо бэчээтин кыһата таһаарар хаһыатыгар, сурунаалларыгар аны сахалыы дорҕоон буукубаларын бэлиэлэрэ баар буолуохтара. “Бу мин сахалыы тыллаах хаһыатым, сурунаалларым”, – диэн ылынаҥҥын үүнэн-үрдээн тахсаргар туһан!
“Чуораанчык” 2022 сыл бастакы нүөмэрэ төрөөбүт тылга тирэҕирэн аангылыйа тылын баһылыыр кыах, күүс хас биирдиибитигэр баарын туһунан кэпсиир, ону көҕүлүүр, ураты киэптээх, кээмэйдээх.
«… Бу аан дойдуга туох барыта кыаллар — санааҥ эрэ тиийиэн наада», — диэн тылларынан сурунаалбытын арыйабыт. «Чуораанчык» тас сирэйин «саҥардарга» 2-с кылаас үөрэнээччитэ Алина Николаева көмөлөстө. Кини Горнай улууһун С.П. Данилов аатынан Дьиикимдэ орто оскуолатыгар үөрэнэр.
Аангылыйа тылынан кыра оҕолорго аналлаах хоһооннору Евдокия Федоровна Васильева уу сахалыы тылбаастаабытын икки тылынан ааҕыаххыт, истиэххит уонна көрүөххүт.
Дьокуускай куорат 75 №-дээх «Ивушка» оҕо саадын эбии үөрэхтээһинин педагога, аангылыйа тылын учуутала Валентина Александровна Семёнова аангылыйа тоҕо аан дойду тыла буоларын туһунан кэпсиир, аангылыйа тылын баһылыырга аналлаах ойуулаах, истиэнэҕэ ыйанар тылдьытын билиһиннэрэр. Дьокуускай куорат «Улыбка» оҕо саадын эбии үөрэхтээһинин педагога, аангылыйа тылын учуутала Күннэй Гаврильевна Саввина “ANIMALS” таайбараҥа дьиэ кэргэни түмүөҕэ.
Чуораанчыктаах Сэлиичээн Англияҕа туох сыаллаах тиийдилэр? Ол туһанан Наталья Николаевна Петрова (Бөтөҥкөс, Үөһээ Дьааҥы) идеятынан суруллубут комикстан билиэххит.
“Баҕа бэргэн” Британия остуоруйатын Мария Корякина сахалыы саҥардыбытын сэргээҥ! Бах-бах баҕа хайдах эдэр бэргэҥҥэ кубулуйбутуй?
«Чуораанчык», “Колокольчик” сурунааллар 35 сааһын көрсө эрэдээксийэ “кыһыл көмүс” пуондатыттан «Тиим кусчаан» Англия остуоруйатын ааҕыҥ.
Өрөспүүбүлүкэ 100 сылыгар аналлаах «Дьиэ кэргэним үйэлээх баайа» бырайыакка Дьокуускай куорат 31 №-дээх орто оскуолатын VI «Д» кылааһын үөрэнээччитэ Арианна Иовлева хос эбээтин туһунан кэпсиир. Арианна дьоллоох олох туоһута бэйэ-бэйэни харыстаһыы, өйдөһүү буоларын өссө төгүл санатар.
“Айыы оҕото” рубрикаҕа Кэнчээри уол туһунан ааҕыаххыт. Кини биэс саастаах. Төһө да кыра оҕо буолбутун иһин үгүс ыарахаттары, моһоллору көрсөр. Ону барытын хайдах тулуйарый? Ол туһунан ааптар Федор Гуляев-Сүбэ Сүөдэр сурунаалбыт бастакы нүөмэриттэн саҕалаан саас-сааһынан кэпсиэҕэ.
Уус Алдан улууһун 17 №-дээх «Сардаана» оҕо саадын иитиллээччилэрэ Аман Горохов, Айыллаана Сосина, Намыына Васильева бастакы айымньыларын кытта билсиэххит.
Таммахчаан эһээлээҕин билэр этигит? Бу нүөмэргэ Чуораанчык уол Таммахчаан ветеран эһээтин кытта билсэр.
Сынньалаҥҥар 3D открытканы оҥор. Хаартыскаҕа түһэр. #3Dоткрыткачуораанчык диэн хештегынан инстаграм страницаҕар таһаар.
2022 сылга «Чуораанчыкка» сурутуу салҕанар. Сурутууга ким туох ыйытыылаах
89142807263, 89142790160 нүөмэрдэргэ эрийэн билсиҥ.