Болтоҥо нэһилиэгин биир бастыҥ эдэр ыала – Слепцовтар. Дьиэ кэргэн аҕа баһылыга – Степан Алексеевич, далбар хотуна – Ньургуйаана Джекшебековна. Кинилэр иккиэн оскуолаҕа учууталлыыллар, оҕолор айар дьоҕурдарын сайыннарар технология уонна уруһуй уруоктарын биэрэллэр.
Слепцовтар үс кыыс оҕолоохтор. Улаханнара Снежана – Чурапчытааҕы гимназия V кылааһын үчүгэй үөрэнээччитэ. Орто кыыс Наташа III кылааһы Болтоҥоҕо туйгуннук бүтэрдэ. Кыралара Саина – «Кэнчээри» оҕо уһуйаанын иитиллээччитэ.
– Үтүө күнүнэн, эһиги дьиэ кэргэҥҥит хаһан үөскээбитэй?
– Дорообо, 2005 сыл балаҕан ыйын 16 күнүгэр. Намнааҕы педагогическай кэллиэскэ үөрэнэ сылдьан билсибиппит.
– Оҕо иитиитигэр ким ордук оруоллаах буолуохтааҕый?
– Ийэ, аҕа иккиэн тэҥинэн үлэлэстэхтэринэ эрэ, оҕо иитиитэ кыаллар.
– Эдэр ыал тыа сиригэр олохсуйарыгар туох усулуобуйа нааданый?
– Үлэ уонна дьиэ туттарга судаарыстыба өттүттэн көмө. Чэпчэтиилээх ипотека дуу, субсидия дуу? Оччоҕо эрэ ыччат дэриэбинэҕэ талаһыа.
– Иллэҥ кэмҥитин хайдах атаараҕыт?
– Уһанар, иистэнэр буоламмыт, дьиэ кэргэнинэн олорон эрэ илиибитинэн ону-маны оҥорорбутун сөбүлүүбүт.
– Төһө көхтөөх ыалгыт?
– Спортивнай күрэхтэһиилэргэ, спартакиадаларга кыттааччыбыт.
– “Кэскил” эдэр кэрэспэдьиэннэригэр баҕа санааҕыт?
– Ураты, умсугутуулаах ыстатыйалары суруйуҥ, араас көрдөөх кэпсээннэри, остуоруйалары айыҥ.
Даша ПЕТРОВА,
VII кылаас.
Болтоҥо, Чурапчы.