Амма Наахара ситэтэ суох орто оскуолатын үһүс кылааһын үөрэнээччитэ Никитин Гоша «Бэлэм буол» хаһыат 1937 сыл олунньу 24 күнүнээҕи нүөмэригэр «Туйгун» үөрэнээччи буолуом» диэн ыстатыйата бэчээттэммит. Гоша онно маннык суруйар: «Сыл аҥардаах үөрэх түмүгэр түөрт предмеккэ «Туйгун», иккигэ «үчүгэй» сыананы ылбытым. Үөрэхпэр хойутаабаппын, көтүппэппин даҕаны. Дьиссипилиинэм үчүгэй. Бу оскуола билиилээх, бастыҥ, үөрэҕин удаарынньыга буоллум. Дьиэбэр уруокпун аккуратнайдык толоробун, кинигэлэрбин, тэтэрээттэрбин ыраастык, туспа долбуурга тутабын. Учууталларбын олус ытыктыыбын, таптыыбын. Үөрэх иккис аҥарыгар «туйгун» буолуом диэн куруук бэлэммин».
Никитин Гоша – Георгий Петрович Никитин кэлин биологическай наука кандидата буолбута. Кини 1926 сыллаахха Мэҥэ Хаҥалас оройуонун Наахаратыгар төрөөбүтэ. Төрөппүттэрэ эрдэ суох буолбуттара. Онон эбэтигэр, онтон интернакка иитиллэн, Майа орто оскуолатын туйгуннук үөрэнэн бүтэрбит. 1944 сыллаахха Сэбиэскэй Аармыйаҕа ыҥырыллыбыт. Сибээс чааһыгар сулууспалыы сылдьан, Японияны утары сэриигэ кыттыбыт.
Аармыйаттан кэлэн баран Дьокуускайдааҕы учууталлар институттарын 1949 сыллаахха туйгуннук үөрэнэн бүтэрбит уонна Кэбээйи оскуолатыгар үлэтин саҕалаабыт. Георгий Петрович бастакы күннэриттэн олус кыһаллан үлэлээн биир сылынан оройуон бастыҥ учуутала буолбут. Уруогу таһынан эдэр натуралистар куруһуоктарын ыытар эбит.
Георгий Петрович Кэбээйи оскуолатыгар өссө биир саҕалааһына бастакы туристическай походтары тэрийиитэ буолар. Ол курдук 1951 сыллаахха 10 үөрэнээччини илдьэ Саҕанан, Куокуйунан, Таас Тумуһунан айаннаан Сангаарга тиийбиттэр. Поход сыала промышленнай тэрилтэлэр техникаларын билсиһии эбит.
Күһүн уонна саас Георгий Петрович оскуола таһыгар көҕөрдүү үлэтин ыытар эбит. Аҥардас 1952 сыллаахха оскуола аттыгар 38 араас мас уонна талах олордуллубут.
Учууталын туһунан биллиилээх суруналыыс, тустууга спорт маастара Владимир Варламов «Ытыктыыр дьоннорум» диэн ахтыытыгар маннык суруйар: «Айылҕа умсулҕана! Мин ханна да сырыттахпына төрөөбүт Ийэ сирим кэрэтиттэн үөрэбин… Ити үтүө иэйиини миэхэ биология учуутала Георгий Петрович Никитин иҥэрбитэ диэтэхпинэ туох да омуннааһына суох буолуо. Кини пришкольнай учаастак тэрийэн кэрэ да сибэккилэри олордоро!
Кэлин сылларга Георгий Петрович Якутскай көҕөрөрүн туһугар төһөлөөх сыратын биэрдэ этэй…».
Георгий Петрович Кэбээйигэ 3 сыл үлэлээн баран педагогическай институту уонна аспирантураны туйгуннук бүтэрбитэ. Биология институтугар үүнээйилэр физиологияларын үөрэтэр лаборатория сэбиэдиссэйинэн үлэлээбит.
1964 сыллаахха «Саха сирин киин улуустарыгар эргэ быраҕыллыбыт учаастактарга тыа хаһаайыстыбатын үүнээйилэрин ньүөлсүтүү, сиигирдии усулуобуйалара» диэн тиэмэҕэ кандидатскай диссертацияны көмүскээн, биологическай наука кандидата буолбут. Кини Саха сирин ирбэт тоҥноох почватыгар үүнээйини олордууга саҥа ньымалары толкуйдаабыт рационализатор этэ.
Георгий Петровичка үөрэнээччитэ Николай Афанасьевич Дьяконов учууталын туһунан бу курдук кэпсээбит: «Учууталбын кытта пришкольнайга сылы быһа үлэлиирбит. Кэлин БГФ-ка үөрэнэн сылдьан кини салалтатынан Чочур Мураан почватын үөрэппиппит. Мастар силистэрэ төһө уһуннаахтарын, ирбэт тоҥ дириҥин билээри күнү быһа буору хаһан тахсарбыт. Быыспытыгар туулаан мунду бөҕөтүн сиирбит. Кини балыгы олус хайгыыра, миигин элбэҕи сиирбэр сүбэлиирэ».
Георгий Петрович мин хос эбэм Наахара Тиэлигитин олохтооҕо Клавдия Ильинична Никитиналыын ини-бии дьон сиэннэрэ эбиттэр. Онон аймахтыы буоламмыт кэргэнэ Ада Петровналыын билсэн хаартыскалары ылбытым.
Кэбээйи – Георгий Петрович олоҕун аргыһын Ада Петровна Афанасьевнаны көрсүбүт сирэ. Ада Петровна Кэбээйигэ 1950-1951 үөрэх дьылыгар учууталлаабыт.
Георгий Петрович аҕата Петр Васильевич Афанасьев Саха АССР үтүөлээх учуутала, Ленин уордьанын кавалера, Платон Алексеевич Ойууунускайы кытта учительскай семинарияҕа бииргэ үөрэммит.
Петр Васильевич Николай Егорович Мординов-Амма Аччыгыйа «Сааскы кэм» романыгар Микиитэ учуутала Уйбаан Кириилэп прототиба эбит. Кини тыыл ветерана этэ.
Наука эйгэтигэр Георгий Петрович утумнааччыларынан биологическай наука доктора, термометр шакалатын ааптара, Эһээ Дьыл Гаврил Спиридонович Угаров, биологическай наука кандидата Семен Романович Попов буолаллар.
11 сааһыгар «Бэлэм буол» хаһыакка «туйгун үөрэнээччи буолуом» диэн суруйбут Гоша Никитин баҕа санаатын толорбута. Оскуоланы, институту туйгуннук бүтэрбитэ, Саха сирин наукатыгар дьоһуннаах кылаатын киллэрбитэ. Саха сирин тыйыс усулуобуйатыгар мастары үүннэрии, көрүү-харайыы ньымаларын үөрэппитэ. Кини олордубут мастара Дьокуускай куорат Орджоникидзе, Аммосов уулуссаларыгар, Ленин проспега үүнэн суугунуу тураллар.
Антон Оконешников, V «А» кылаас,
Е.Е. Эверстов аатынан Кэбээйи орто оскуолата, 2016 с.
Салайааччылар – Валентина Николаевна Иванова,
нуучча тылын уонна литературатын учуутала;
Вера Николаевна Заровняева, химия, экология учуутала