Сэтинньи 7 күнүгэр биһиги, 8-с кылаас үөрэнээччилэрэ, төрөппүттэрбитин кытта «Саха буолан сандаар» бырайыакпытынан кылаас чааһын ыыттыбыт.
Биһиги чиэппэр түмүгүнэн үөрэхпитин, туохха, ханна кыттыбыппытын, туох ситиһиилээхпитин уонна инники былааммытын, сыалбытын кэпсээтибит. Ону тэҥэ фольклор кылааһыгар үһүс сылын үөрэнэ сылдьар дьарыкпытын, саха төрүт инструменнарыгар норуот матыыбын оонньоон, тыаһатан иһитиннэрдибит. Төрөппүттэргэ фольклорга уһуйар учууталбыт Айта Егоровна Васильева инники дьарыктар былааннарын сиһилии билиһиннэрдэ.
Бырайыакпытыгар «Төрөппүттүүн ааҕабыт» диэн биир хайысхабытыгар олохтоох модельнай библиотекаттан Акулина Корниловна Маркова, Сандаара Николаевна Канаева уонна оскуола педагог библиотекара Розабелла Ананьевна Готовцева саха норуодунай суруйааччыта Д.К. Сивцев — Суорун Омоллоон төрөөбүтэ 120 сылыгар аналлаах айар үлэтин чинчийэр, сыаналыыр викторина ыыттылар, бары көхтөөхтүк кыттан, элбэҕи биллибит.
Оскуола психолога Дарина Васильевна Николаева төрөппүттэргэ анаан практическай сүбэ-ама бэсиэдэтин тэрийдэ. Оскуола технигэ Иван Николаевич Лебедев үөрэх эйгэтигэр киэҥник туттуллар «Сферум» куйаар ситимин туһунан туһалаах иһитиннэриини оҥордо.
Маннык сылын аайы төрөппүттэрбитин кытта үгэскэ кубулуйбут көрсуһүүбүтүгэр үөрэххэ, бэрээдэккэ эппиэтинэстээх, олохпутугар сөптөөх суолу тутуһан, идэлээх үлэһит буоларга сыал-сорук туруорар кылаас чааһа олус туһалаах дии саныыбыт.
8 кылаас үөрэнээччилэрэ, Н.Д.Неустроев аатынан УусТаатта орто оскуолата, Таатта улууһа