Күүс-уох, дьулуур уонна кыайыы аргыһа — тренер күнүнэн эҕэрдэлиибит!
Саха сиригэр уонна бүтүн Арассыыйаҕа успуорт, чөл олох уонна дьулуурдаах буолуу бырааһынньыга — Тренер күнэ сыллата алтынньы 30 күнүгэр бэлиэтэнэр. Бу күн официальнай өрөбүлүнэн ааҕыллыбат эрээри, успуорт эйгэтигэр биир саамай суолталаах, сырдык бырааһынньыгынан буолар.
Тренер диэн успуорт ньымаларыгар эрэ үөрэтэр киһи буолбатах. Кини — психолог, педагог, стратег уонна доҕор эмиэ буолуон сөп. Кини кыһаллыыта, тулуура уонна итэҕэлэ улахан кыайыыларга тиэрдэр. Тренер эппиэтинэһигэр үөрэнээччи этэ-хаана эрэ сайдыыта буолбакка, кини майгыта-сигилитэ, дьиссипилиинэтэ, ыарахаттары туоруур дьоҕура эмиэ киирсэр.
Оттон Саха сиригэр тренер оруола эмиэ ордук үрдүктүк сыаналанар. Тыйыс айылҕалаах, уһун кыһыннаах дойдуга оҕону успуорка угуйуу — бу хорсун быһыы. Тренер оҕоҕо кыайыыга эрэли, бэйэтигэр эрэллээх буолууну иҥэрэр, кинини кыайыыга-хотууга сирдиир сулус кэриэтэ.
Бүгүҥҥү бырааһынньык, ренер күнүн идиэйэтэ 1990-с сыллар бүтүүлэригэр Арассыыйа успуорт гимнастикатын федерациятыттан тахсыбыта. Успуорт салайааччылара уонна энтузиастара бу идэни судаарыстыба таһымыгар билинэргэ, тренердэр сыралаах үлэлэригэр махталларын биллэрэргэ быһаарыммыттара.
Бастаан бу күнү успуорт кулууптара уонна оскуолалара эрэ бэлиэтииллэрэ. Онтон кэм аастаҕын аайы, бу үгэс кэҥээн, бүтүн дойду үрдүнэн тарҕаммыта. Билигин бу күнү тренердэр эрэ буолбакка, спортсменнар, төрөппүттэр уонна успуорду таптааччылар бары бииргэ кэриэтэ бэлиэтииллэр.
Онон бу күн тапталлаах, убаастыыр тренердэргитигэр махтал тылларын этэргэ, үтүө өйдөбүлү хаалларарга саамай тоҕоостоох күн. Успуорт хонуутугар тахсар кыайыылар үксүгэр көрөөччү хараҕыттан «көстүбэт» үлэнэн ситиһиллэллэр. Сарсыардаттан киэһээҥҥэ диэри дьарык, харах уута, илии-атах эчэйиитэ, араас куораттарынан айан — бу барыта тренер күннээҕи түбүгэ.
Биһиги өрөспүүбүлүкэбитигэр үгүс ааттаах-суоллаах тренердэр үлэлииллэр. Кинилэр уһуйбут оҕолоро Арассыыйа, Европа, Аан дойду таһымыгар Саха сирин былааҕын күөрэтэллэр. Олимпийскай оонньуулар, Сурдлимпийскай оонньуулар, «Азия оҕолоро» успуорт оонньууларын кыайыылаахтара — бу бары тренердэр сыралаах үлэлэрин түмүгэ.
Алтынньы 30 күнэ — тренергэ, ол эбэтэр учууталга, аҕа сүбэһиккэ, олоххо сирдиир киһиэхэ махтал күнэ. Күндү тренердэр, эһиэхэ чэгиэн доруобуйаны, тулууру, саҥа кыайыылары уонна махталлаах иитиллээччилэри баҕарабыт! Эһиги сыралаах үлэҕит — норуот кэскилэ, кини чиэһэ уонна киэн туттуута.
Кэскил14.ру