Бу күннэргэ биһиги, юнкордар нэһилиэкпит биир саамай тутаах тэрилтэтин – олох-дьаһах коммунальнай хаһаайыстыбатын хочуолунайыгар сылдьан, маастар Егор Васильевич Андросовы көрсөн кэпсэттибит.
Егор Васильевич билиһиннэрбитинэн, тэрилтэ 16 үлэһиттээх, икки хочуолунайдаах. Үс сыллааҕыта манна улахан өрөмүөн үлэтэ ыытыллыбыта.
Нэһилиэк икки хочуолунайа, бастатан туран, социальнай суолталаах тэрилтэлэри – оскуоланы, оҕо саадын, балыыһаны, олохтоох дьаһалта хонтуоратын, спортсааланы, кулуубу, музейы уонна алта уонча чааһынай дьиэни итиинэн хааччыйар.
Кыстыгы туох да саахала суох этэҥҥэ туоруур туһугар оттук сезона саҕаланыан иннинэ өрөмүөн үлэтэ үгүстүк ыытыллыбыт. Ол курдук быйылгы сезоҥҥа киириэх иннинэ сылаас ситимэ барар трассатыгар, чааһынай дьиэлэри сылааска холбооһуҥҥа, хочуолунай оһохторун өрөмүөннээһиҥҥэ былааннаммыт үлэни ыыппыттар. Онон ОДьКХ үлэһиттэрэ оттук сезонун этэҥҥэ ыытарга санаалара бөҕөх.
Олох-дьаһах коммунальнай хаһаайыстыбатын үлэһиттэрин иннигэр турар сүрүн соругунан – ититэр ситимҥэ 100 дьиэни холобооһун. Егор Васильевич этэринэн, быйылгы сылга эбии 10 дьиэ холбонуохтаах.
Биһиги нэһилиэкпит хочуолунайдара таас чоҕунан оттуллаллар. Ол туһунан биһиги ыйытыыбытыгар ОДьКХ маастара маннык хоруйдаата:
– Нэһилиэк кыстыгы этэҥҥэ туорууругар быйылгы былаанынан, киин хочуолунайга 870 тонна чох оттуллуохтаах. Балыыһа хочуолунайа оттук сезонун устата 100 тоннаны оттор. Биир оттукка, сууккаҕа ортотунан, 10-тан тахса тонна чоҕу оттобут. Билигин халлаан саҥа тымныйан эрэр. Онон күнүскү кэмҥэ 5-5,5 тонна кэриҥэ чох барар. Халлааммыт тымныйдаҕына, биллэн туран, ороскуоппут улаатар – 15-18 тоннаҕа тиийэр. Биһиги модульнай хочуолунайбытыгар оттор чохпут Хакасияттан степной чох тиэллэн кэлэр. Кочегардарбыт урукку курдук, илиинэн күрдьэн куппаттар – барыта автоматиканан үлэлииллэр. Онон үлэлэрэ уруккутааҕар быдан чэпчээтэ. Киин хочуолнайга аҕыс киһи иккилии буолан сменанан тураллар. Онтон балыыһа хочуолунайыгар түөрт киһи үлэлиир, сменаҕа биирдии киһи турар. Ону таһынан икки сантехник, биир сварщик, электрик үлэлииллэр, – диэн ОДьКХ маастара Е.В. Андросов үлэ хаамыытын туһунан билиһиннэрдэ.
Нэһилиэкпит тутаах тэрилтэтигэр сылдьан, көрөн-истэн, маастары кытта көрсөн, кэпсэтэн, кыһын устата сылааһы хааччыйар дьоммут үлэлэрин өссө ордук улаханнык сыаналаатыбыт. Эһиги уустук үлэҕитигэр махтанан туран оттук сезонугар ситиһиилэри баҕарабыт.
Күндүүнэ ЕГОРОВА, IX кылаас
Дайаана Неустроева, Камила Неустроева хаартыскалара, IX кылаас
«Байаҕантай кэскиллэрэ» медиа-киин, М.Н. Готовцев аатынан
Танда орто оскуолата, Уус Алдан