Итинник ааттаах Сергей Егоров ыстатыйата «Бэлэм буол» хаһыат 40 сылыгар анаан тахсыбыт 1976 с. ыам ыйын 16 күнүнээҕи нүөмэригэр бэчээттэммит. Оччолорго 20 сааһын эрэ ааспыт эдэркээн уол оҕо сааһа «Бэлэм буол» хаһыаты кытта ситимин туһунан олус истиҥник суруйбут.
«Корреспондент Сэргэй» диэн оҕо эрдэҕиттэн иҥпит аата кинини олоҕун устата арыаллаабыта. Сергей Михайлович суруналыыс буолар баҕа санаатын толорон, төрөөбүт Өймөкөөнүн улууһугар сахалыы тыллаах «Хотугу сардаҥа» хаһыаты тэрийбитэ. Кыраайы үөрэтээччи, сахалыы тыллаах суруналыыстары иитэн таһаарбыт суруналыыс быһыытынан биллэр-көстөр киһи буолан тахсыбыта.
Сергей Михайлович Егоров-Кэрэспэдиэн Сэргэй «Бэлэм буол» 1976 с. ыам ыйын 16 күнүнээҕи нүөмэригэр бэчээттэммит ыстатыйатын ааҕыаххайыҥ.
Аан маҥнай мин «Бэлэм буолу» кытта 1962 с. II кылааска үөрэнэ сылдьан билсибитим. Учууталым Мандарова Александра Николаевна биирдэ биһигини хаһыаттарга, сурунаалларга суруйтарыҥ диэбитэ. Мин онно «Бэлэм буолга» уонна «Мурзилка» сурунаалга суруйтарбыппын өйдүүбүн.
Арай биирдэ, VII кылааска үөрэнэ сылдьан, аҕыйах тыллаах информацияны суруйан редакцияҕа ыыппытым. «Бэлэм буол» саҥа нүөмэрэ кэллэҕин аайы заметкам тахсаарай диэн кэтэс. Күүппүт санаабар, олус да уһаттылар этэ, быһыыта. Кэнэҕэс кэтэспэт да буолан бардым. Биир переменаҕа оҕолор почтаттан саҥа хаһыаттары аҕалан түҥэтэ сырыттылар. Эмискэ Коля Винокуров: «Көрүҥ, көрүҥ, Сэргэй суругун бэчээттээбиттэр», – диэн хаһыыра түһэр. Мин бокуойа суох Коляҕа ыстанан тиийэбин уонна аахпытынан барабын. Оо, онно долгуйбуппун эриэхсит! Ханнык эрэ бүтүн роман дуу, драма дуу бэчээттэппит киһи курдук санаммытым. Онтон ыла оҕолор миигин үгүстүк «Корреспондент Сэргэй» диэн элэктээн ыҥыраллара. Онуоха мин өһүргэммэт этим, хата, өрүү киэн тутта саныырым.
Сыл-хонук дииллэр, онтон ыла тоҕус сылтан ордук кэм биллибэккэ устан ааста. Ити кэм устата мин таптыыр «Бэлэм буолбар» 40-ча араас заметкалары, ыстатыйалары, зарисовкалар о.д.а. матырыйааллары бэчээттэттим. «Бэлэм буол» хаһыаттан аан бастаан туппут Иван Веревкин илии баттааһыннаах деткорун памяткатын күн бүгүнүгэр диэри уура сылдьабын.
Билигин мин республика бары хаһыаттарыгар общественнай корреспондент үрдүк уонна бочуоттаах аатын сүгэбин. Онон муҥура суох киэн туттабын.
Ол гынана баран аан бастаан миэхэ куорсун анньан корреспондент сыралаах үлэтигэр көтүппүт хаһыат диэн «Бэлэм буолу» ааҕабын. Өрүү өйдүүбүн «Бэлэм буол» 1970 с. ыам ыйын 5 күнүнээҕи нүөмэригэр «Уоту, ууну, алтан турбаны курдаттаан» диэн ыстатыйатыгар мин туспунан ахтан аһаран, хаһыат хайдах оҥоһулларын туһунан сиһилии кэпсээбитин. Онно республика сүүһүнэн активнай деткордарыттан мин суругум хайдах оҥоһуллан, чочуллан хаһыакка тахсыбытын туһунан суруллубут этэ. Онуоха үөррбүтүм, махтаммытым муҥура суох.
Оттон «ֿБэлэм буол» 1969 с. 79-с уонна 1970 с. 83-с нүөмэрдэригэр бэчээттэммит икки хоһооннорум эмиэ үчүгэй бэлиэ түгэннэри хаалларбыттара. Билигин эмиэ хоһоон суруйабын, ол гынан баран бэчээттэтэ охсорго тиэтэйбэппин. Хаһан эмэ хоһооннорбун таһааттарар күннээх буоллахпына, «Бэлэм буолум» үтүөтэ диэн ахта саныам.
Миэхэ, баҕар, тапталлаах «Бэлэм буолум» сахпыта буолуо, журналист буолан хаһыакка үлэлиир баҕа санаалаахпын. Ол да инниттэн Саха государственнай университетын саха тылын отделениетыгар үөрэнэ киирбитим. Хаһан эмэ, хайаан да хаһыат үлэһитэ буолуом диэн эрэнэбин. Буоллахпына, аан бастаан «Бэлэм буолга» эҕэрдэбин ыытыаҕым.
… Миэхэ «Бэлэм буол» хаһыатым: «Өрүү миэх көмөлөһөргө бэлэм буол», – диирэ буоллар, «Өрүү мэлдьи бэлэммин, күндү учууталым «Бэлэм буол»! – диэн туох да саарбаҕа суох хардыарыах этим.
Сергей Егоров, Өймөкөөн, Төрүт
«Бэлэм буол» хаһыат 1976 с. ыам ыйын 16 күнүнээҕи нүөмэриттэн
Тылы баһаарыы: Деткордар – юнкордар