Саха уһулуччу уола ССРС Үрдүкү Сэбиэтин дьокутаатынан талыллыбыт Былатыан Ойуунускай 1938 сыллаахха «Пионерская правда» хаһыакка «Шесть вопросов депутату» диэн балаһаҕа алта ыйытыыга хоруйдара тохсунньу 12 ыйыгар бэчээттэммитэ. Кини Саха сирин сонуннараны үллэстибит: Москубаҕа кэлэригэр пионердар дыбарыастара арыллыбыт, өрөбөлүүссүйэ иннинэ хамначчыттаабыт 70 саастаах кырдьаҕаһы билигин холкуос бэрэссэдээтэлинэн талбыттар. Манна баҕа санаата диэн Сталины көрсөн кэпсэтии эбит. Бука, сэрэйдэххэ оччолорго репрессияламмыт (1937 сыллаахха) доҕорун Максим Аммосов туһунан кэпсэтээри гыммыта буолуо.
Онтон «Литературная газета» диэн суруйааччылар сойуустара таһаарар хаһыаттарыгар эмиэ бу күн «Всегда и везде выполнять Сталинский наказ» диэн ыстатыйата хаһыат бастакы балаһатыгар тахсыбыт. Ыстатыйаҕа Сэбиэскэй былаас саха хараҥа норуотун хараҕын аспытын, сайдыы, үөрэх-билии тарҕаммытын туһунан киэн тутта суруйар. Онтон ыстатыйа бүтүүтүн болҕойон аахтахха «… проявлять бдительность и беспощадность к врагам народа, проявлять Сталинскую мудрость и неторопливость при решении сложных вопросов» диэн устуруокалар Ойуунускай оччотооҕу санаата муунтуйуутун көрдөрөллөр.
Былатыан Ойуунускайы бу кэннэ, олунньу 3 күнүгэр, сымыйа дьыалаҕа балыллан НКВД хаайбыттара.
Евдокия Семенова, И. Барахов музейын үлэһитэ.
Кэскил14.ру