Мин Орто Халыма улууһун тиһэх бөһүөлэгэр олоробун. Халыматтан биһиэхэ диэри 218 км., мантан салгыы туундара.
Атырдьах ыйын 11 күнүгэр бөһүөлэктэн 1,5 көс тэйиэс баар «Санниковтар айааннара» диэн сиргэ балыксыттар соҕотох овцебыгы көрбүттэрэ. Оттон алта күнүнэн арай бөһүөлэкпит арҕаа өттүгэр уу бастар «Ойбон көлүйэбитигэр» тиийэн кэлбит. Бу дьикти харамай бөһүөлэк олохтоохторун олус диэн соһутта. Эчи улаханын, эчи түүтэ уһунун, эчи муоһа дьиктитин…
Овцебык 200-350 киилэ ыйааһыннаах буолар эбит. Сиргэ тиийэр уһун хойуу түүлээх. Түүтэ «нивьют» диэн ааттанар уонна бары билэр бараан түүтүнээҕэр 8 төгүл сылаас буолар эбит. Бу дьикти харамайбыт аҕыйаан эрэриттэн Кыһыл кинигэҕэ киирбит. Онон элбэтэр сыаллаах Аллараа Халымаҕа уонна Аллайыахаҕа анал пааркаҕа иитэллэр. Арааһа, онтон куоппут булуон сөп. Дьиңэр, овцебыктар соҕотохтуу сылдьыбаттар, онон үөрүттэн үүрүллэн дуу, туоратыллан дуу мэнээктээбитэ буолуо дии саныыбын.
Овцебык бөһүөлэги эргийэн соҕуруу диэки салгыы бара турбута.
Эмилия Заболоцкая, 9 кылаас, Өлөөкө Күөл, Орто Халыма