Бүгүн, атырдьах ыйын 18 күнүгэр, Дьокуускайга «Вода России» экологическай акция буолан ааста. Быйыл акция 12 төгүлүн ыытыллар.
Ол курдук, киин куораппыт сөтүөлүүр сирин, Өлүөнэ эбэбит кытылын бөхтөн-сыыстан ыраастыырга бары баҕалаахтар: тэрилтэлэр үлэһиттэрэ, устудьуоннар, волонтердар, олохтоохтор көхтөөх кыттыыны ыллылар. Мустубут дьону Ил Дархан Айсен Николаев эҕэрдэлээтэ, бары кыттааччыларга махталын биллэрдэ: «Бүгүн бачча элбэх киһи мустубута айылҕабытыгар, уубутугар харыстабыллаахтык сыһыаннаһыахтаахпытын өйдүүрбүт күүһүрэн иһэрин туоһулуур. Элбэх ыччат мустубутун көрөр ордук үөрүүлээх. Бука бары күүспүтүн түмэн куораппыт, өрөспүүбүлүкэбит, дойдубут ыраас буоларын ситиһиэхпит диэн бигэ эрэллээхпин».
Итиэннэ Арассыыйа экологияҕа миниистирин солбуйааччыта Максим Корольков Саха сирин олохтоохторугар илдьитин ыыппыт.
Акция кыттыылаахтара икки улахан бөлөххө хайдыһан өрүс кытылын ыраастаатылар. Бөлөхтөрү биллэр спортсмен, урбаанньыт, Дыгын оонньууларын 7 төгүллээх кыайыылааҕа Егор Филиппов уонна биллиилээх блогер, ырыаһыт Эркээнэ Алмаас салайдылар.
Санаттахха, былырыын Таатта улууһун Чычымах нэһилиэгин үөрэнээччилэрэ Амма өрүс кытылын ыраастаан «Общий сбор» федеральнай күрэх муҥутуур кыайыылаахтара буолбуттара. Онон, тэрийээччилэр быһаарыыларынан, бу акцияҕа Саха сирэ кыттарыгар кыах бэриллибитэ.
«Вода России» акция «Сохранение уникальных водных объектов» федеральнай бырайыак чэрчитинэн ыытыллар. Тэрээһин Сахабыт сирин үгүс улуустарыгар, итиэннэ дойду бары регионнарыгар ыытыллыаҕа.
Алексей Борисов
Кэскил14.ру