Сибиирдээҕи искусство институтун (Красноярскай к.) ситиһиилээхтик бүтэрбит, Федосий Заровняев “Сказитель” диэн быыстапката «Үргэл» арт-галереяҕа аһылынна. Эдэр худуоһунньук дьоҕурунан, талаанынан Россия худуоһунньуктарын сойууһун чилиэнэ буола үүммүтэ элбэҕи этэр.
Федосий Заровняев П.П.Романов аатынан Дьокуускайдааҕы художественнай училище “Живопись” салаатын бүтэрэн, Красноярскайга станковай живопись салаатыгар үөрэххэ киирбитэ.
“Уруу сиэрэ-туома” дипломнай үлэтэ улахан хайҕабылы ылла.
“Сказитель” — Федосий төрдүс быыстапката. Кини бэйэтэ этэринэн, араас жанры, хайысханы боруобалыыр, мэтириэти, пейзаһы да суруйар.
Красноярскай институтун биир күүстээх өрүтүнэн сырдык-хараҥа хоһулаһыытын ураты ньыманан суруйуу буолар. Федосий бу хайысханы олус үчүгэйдик баһылаан, ураты тыыннаах ис хоһоонноох хартыыналары быыстапкаҕа туруорда.
Искусствовед, доцент Наталья Покровская: “Декоративнай пластика, сырдык-хараҥа оонньуута, дьиҥ олоххо баар көстүү уонна фантазия – бу Федосий Заровняев ураты буочара. Кини норуотун күннээҕи олоҕун түгэнигэр туспа эстетиканы, ассоциацияны булан, бэлиэтээн, ымпыгар-чымпыгар тиийэ ураты нарын-намчы уонна чопчу ньыманан суруйар”, — диэн бэлиэтээбитэ.
Ааптар: Таисия Алексеева.