Ыам ыйын 30 күнүгэр Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар «Мин — өрөспүүбүлүкэ инники кэскилэбин!» диэн тумус тыллаах «Ситиһии күнэ» буолан ааста. Дьоро күн бастакы чааһынан физика кабинетыгар бастыҥ, киэн туттар, элбэх оҕону физика предметинэн умсугутан, саахымакка уһуйан, үрдүккэ көтүппүт дириҥ билиилээх, талааннаах учууталбыт Степан Николаевич Александров сырдык аатын иҥэрии, киниэхэ анаммыт «Үрдүккэ кынаттаабыт учууталбыт — Степан Николаевич Александров» стендэни арыйыы буолла. Бу стендэни оскуола түмэлин салайааччыта В.В. Блахирова хамаанда тэринэн оҥордулар.
Стендэ бастакы чааһа С.Н. Александров олоҕун уонна үлэтин билиһиннэрэр. Иккис блокка улууска, өрөспүүбүлүкэҕэ, Арассыыйаҕа, Норуоттар икки ардыларынааҕы олимпиадаларга, саахымакка күрэхтэһэн миэстэлэспит, физиканы кытта сибээстээх үөрэхтэргэ үөрэммит үөрэнээччилэрин ааттара сурулунна. Үһүс блокка бу испииһэктэргэ киирбит физиканан, саахыматынан Степан Николаевичка дьарыктаммыт үөрэнээччилэрин хаартыскалара кэчигирээтэ. Кабинет үөрүүлээх аһыллыытыгар тапталлаах учууталларын туһунан видео ахтыыны Новай Зеландияттан тиийэ ыыппыттарын истэн олус астынныбыт. Харбалаахтан Дьокуускайтан үөрэнээччилэрэ Айсена Васильева, Михаил Новгородов, Ольга Бродникова уо.д.а. тыл эттилэр. Бу кабинет үүнэр көлүөнэ ыччаты үрдүккэ сирдии турдун диэн алгыс тылынан үөрүүлээх чааһы түмүктээтибит.
Дьоро күн иккис чааһа аактабай саалаҕа салҕанна. Үгэс быһыытынан, үөрэх туйгуннара, бастыҥнара, олимпиадалар, араас НПК-лар, ааҕыылар, спортивнай күрэхтэр кыайыылаахтара чиэстэннилэр. Уһулуччу ситиһиилээх оҕолор отучча араас стипендиялары тутан үөрдүлэр. Стипендиялары туттарыы быйыл стипендиаттары үйэтитэр стендэ таһыгар ыытыллыбыта сонун көстүү буолла. Стипендияны туппут үөрэнээччи ол стендэҕэ хаартыскатын тута уган үйэтиттэ. Быйыл урукку стипендияларга эбии Евдокия Трофимовна, Виктор Васильевич Протопоповтар дьиэ кэргэн 2 стипендияны олохтоотулар. Ол курдук, анал байыаннай дьайыыга хорсуннук сэриилэһэ сылдьан сырдык тыына быстыбыт уоллара Сергей Викторович Протопопов аатын үйэтитэн, успуорка ситиһиилээх оҕоҕо стипендияны уонна аҕалара үөрэхтээһин туйгуна, уус бэрдэ Виктор Васильевич Протопопов аатынан сүүрүк оҕоҕо туттарыллар стипендиялары анаатылар.
Быйылгы үөрэх дьылыгар «Сыл бастыҥ үөрэнээччитэ» үрдүк ааты 11 кылаас туйгун үөрэнээччитэ Айсен Бястинов сүгэр чиэскэ тигистэ. Киниэхэ холбоһук директора Л.А. Афанасьева холбоһук администрацията быйылгыттан саҥа олохтообут Н.Е. Мординов-Амма Аччыгыйа аатынан бастакы нүөмэрдээх стипендияны үөрүүлээх быһыыга-майгыга туттарда. Ону таһынан, олохтоох дьаһалта бэлэҕин тутта. Айсен маҥнайгы кылаастан наар «5» сыанаҕа үөрэнэн кэллэ, араас предметтэргэ ситиһиилээх олимпиадник, академическай ааҕыы бөлөҕөр дьарыктанан элбэх Арассыыйатааҕы, өрөспүүбүлүкэтээҕи ааҕыылар лауреаттара, уопсастыба олоҕор көхтөөхтүк кыттар киэн туттар үөрэнээччибит буолар. «Үөрэнээччи сөбүлүүр учуутала» үрдүк ааты сүктүлэр Кристина Старостина, Ньургуйаана Уварова. Оттон төрөппүт билиниитин ылар учууталларынан буоллулар: Светлана Романовна Винокурова, Варвара Павловна Трофимова.
Ити курдук, сыллааҕы ситиһиилэри түмэр, бэлиэтиир тэрээһиммит үрдүк таһымҥа ааспытыттан бары олус астынан тарҕастыбыт. Бүгүҥҥү үөрүүлээх тэрээһин өссө үрдүк ситиһиилэргэ кынаттаатын!
Валентина Кривошапкина, Харбалаах, Таатта.
Кэскил14.ру