Муус устар 27 күнүгэр Н.Е. Мординов-Амма Аччыгыйа аатынан Харбалаахтааҕы үөрэхтээһин холбоһугар Өрөспүүбүлүкэ күнүгэр аналлаах үөрүүлээх тэрээһин буолла. Тэрээһини саха тылын учуутала СӨ үтүөлээх учуутала Валентина Семеновна Кривошапкина салайан ыытта.
«Харбалаах уоланнара» академическай ааҕыы бөлөҕө Саха Өрөспүүбүлүкэтин туһунан ааҕан ньиргиттилэр.
Онтон бу күн ураты суолтатын туһунан Валентина Семеновна билиһиннэрдэ. СӨ үтүөлээх учуутала Валентина Викторовна Блахирова быйыл пааспар ылар Антоева Вероникаҕа, Халыев Эрсаҥҥа, Ксенофонтова Настяҕа «Инникилэр хамсааһыннара» тэрээһин бэлэхтэрин туттарда. Кинилэр бу кэмтэн ыла Арассыыйа гражданина буолан, эппиэтинэстэрэ үрдүүрүн чопчулаан эттэ. Салгыы иитэр үлэ саабыһа Варианна Васильевна Макарова «Харбалаах уоланнара» бөлөххө бүтүн Арассыыйатааҕы «Оскуола үөрэнээччилэрин Сандал сааһа» фестиваль регионнааҕы этабыгар хоһоонунан кыттан, иккис истиэпэннээх лауреат буолбуттарын туоһулуур дипломнары туттарда. Ону таһынан, улуустааҕы «Зарница» күрэххэ кыттыбыт оҕолорго туоһу суругу биэртэлээтэ.
Оскуола үөрэнээччилэрэ уонна учууталлара бары күргүөмүнэн Сайа тылларыгар, Ангелина Файрушина матыыбыгар «Сахам сирэ» ырыаны ыллаатыбыт. Түмүккэ, Аал луук мас тула оһуокайдаатыбыт. Оһуокайы 8 кылаас үөрэнээччитэ Вероника Антоева таһаарда. Саха Өрөспүүбүлүкэтин күнэ — өрөгөй күнэ олус сэргэхтик ааста. Үөрэнээччилэр Саха сиригэр олорорбутунан киэн тутуннубут.
Тася Андреева, 9 кылаас үөрэнээччитэ, Таатта, Харбалаах.
Кэскил14.ру