Биһиги бүгүҥҥү ыалдьыппыт, Горнай улууһун тыа хаһаайыстыбатын салалтатын сүрүн зоотехнига – Владимир Владимирович Андреев. Кини биһиги бэлэмнээбит ыйытыктарбытыгар хоруйдаата.
— Владимир Владимирович, быйыл улууспутугар тыа хаһаайыстыбата сайдыытыгар туох, саҥа уларыйыылар киирдилэрий, туох үлэ бара турарый?
— Бары билэргит курдук, Горнай улууһун Л.Н. Харитонов аатынан Маҕарас оскуолата агрохайысхалаах оскуола буолар. Аҕыйах сыллааҕыта хотонноругар айшир боруода ынахтары аҕалбыппыт уонна быйылгыттан Солоҕон нэһилиэгэр «Солоҕон Ас» диэн бэйэ бородууксуйатын оҥорон таһаарар тэрилтэ үлэтин саҕалаабыта, манна хотонноругар айшир, краснопестрай уонна джерси диэн боруодалары аҕалбыппыт.
— Дьон ордук тугунан дьарыктанарый: сүөһү-сылгы, көтөр ииттиитинэн дуу, оҕуруот олордуутунан дуу?
— Дьон үксэ сүөһүнү-сылгыны иитэр. Улууспутугар дьиэ кэргэн экономиката диэн бырагыраама чэрчитинэн баҕалаах элбэх оҕолоох дьиэ кэргэҥҥэ кууруссалары, сибиинньэлэри түҥэтэбит.
— Билигин саҥа хаһаайыстыба арыныан баҕарар киһиэхэ туох өйөбүл баарый? Улуус уонна государство өттүттэн?
— Саҥа хаһаайыстыба арыныан баҕарар дьоҥҥо социальнай контракт диэни сүбэлиэм этэ. Оҕуруот үүннэрэн, сүөһү эбэтэр сылгы ииттэн, салгыы бааһынай хаһаайыстыба тэринэн, улуус уонна государство өттүттэн өйөбүл ылыахтарын сөп. Улууска биэс ыанар ынахтан үөһээ хаһаайыстыбалаах дьоҥҥо саҥа хотон тутааһыныгар өйөбүл баар. Улууспутугар социальнай контрагы туһанар дьон ахсаана үрдүүрэ үөрдэр.
— Онтон улууспутугар хас кэтэх хаһаайыстыба, бэйэ бородууксуйатын таһаарар тэрилтэ баарый?
— 2025 сыл түмүгүнэн 246 кэтэх хаһаайыстыба баар. Үксүлэрэ сүөһү ииттиитинэн дьарыктаналлар.
— Эн санааҕар, аныгы технология тыа хаһаайыстыбата сайдарыгар хайдах көмөлөһүөн сөбүй?
— Мин санаабар, агрономия өттүгэр, сир көрөөһүҥҥэ, уоҕурдуу ыһыытыгар, сүөһү аһатыыга квадрокоптердар туһаныллыахтарын сөп.
Владимир Владимирович, эппиэттэриҥ иһин махтал! Үлэҕэр үрдүк ситиһиилэри баҕарабыт!
Сиһилии видео-матырыйаалбытыгар көрүҥ:
Кэпсэттэ – С.П. Данилов аатынан Бэрдьигэстээх оскуолатын «Сайдам» медиакиин эдэр кэрэспэдьиэнэ, 5 «а» кылаас үөрэнээччитэ Алина Петрова, Арина Лаптева видеоҕа устуута.