Муус устар 17 күнүгэр санитарно-эпидемиологическай сулууспа Мэҥэ Хаҥаластааҕы филиалыгар күүтүүлээх көрсүһүүбүт буолла. Биһиги улуустааҕы санитарнай-эпидемиологическай сулууспа салайааччытын солбуйааччытыттан Ольга Зиновьевна Семеноваттан интервью ыллыбыт.
— Үтүө күнүнэн, күндү көрөөччүлэр! Биһиги бүгүн Мэҥэ Хаҥалас улууһун нэһилиэнньэтин доруобуйатын туругун туһунан билиэхпит.
— Үтүө күнүнэн!
— Доруобуйа харыстабыла федеральнай бырайыак чэрчитинэн улууспутугар туох сүрүн үлэ баран иһэрий?
— Биһиги бу бырайыак чэрчитинэн уонна үлэбитинэн олохтоох оҥорон таһаарар тэрилтэлэртэн продукция ыламмыт куоракка уонна Москваҕа ыытабыт ону кинилэр араас анализ оҥороллор: микробиологическай, санитарно-гигиеническай уонна бу нормативтарга техрегламеҥҥа эппиэттиирин бэрэбиэркэлииллэр. Бу бырайыак биһиэхэ үлэлээбитэ иккис-үһүс сыла буолла. Билигин үчүгэй көрдөрүүлээх иһэр.
— Бу бырайыак биһиги улууспут олохтоохторугар туох чопчу туһаны аҕалла?
— Туһата диэн элбэх буоллаҕа. Биһиги олохтоох оҥорон таһаарар тэрилтэлэрбититтэн бэйэбит үүппүтүн, эппитин сиэн-аһаан олорорбут доруобуйабытыгар үчүгэй буоллаҕа дии. Холобура, анализтара куһаҕана эбитэ буоллар, атыыттан-эргиэнтэн сыыйыллыахтара этэ. Оччоҕо биһиги кэлии астары аһыа этибит. Оттон олохтоох дьоммутуттан ылан аһыырбыт улууспутугар да үчүгэй, доруобуйабытыгар да туһалаах.
— Баһаалыста үлэҕитин сырдатыҥ.
— Биһиги үлэбит сүрүн сыала — ырааһы көрүү. Ол курдук, салгыммыт, уубут, буорбут санитарнай нормаларга төһө эппиэттиирин көрөбүт. Оскуолаларга, уһуйааннарга, маҕаһыннарга сылдьаммыт бэйэлэрин төһө өрө тардынан олороллорун эмиэ бэрэбиэкэлиибит. Эһиги оскуолаҕа аһыыр аскытын ыламмыт нормативка эппиэттиирин эмиэ анализтыахпытын сөп. Холобур, эһиэхэ сыһыаннааҕы эттэххэ, кылаастарга киирэн температура, салгын сиигэ хайдаҕын диэн уонна лаампаларгыт уота оҕо үөрэнэригэр сөп түбэһэр дуо диэн бэрэбиэркэлиибит. Кылгастык эттэххэ, итинник үлэлии олоробут.
— Мэҥэ Хаҥалас спорт эйгэтигэр киэҥник биллэр улуус. Нэһилиэк, улуус, өрөспүүбүлүкэ таһымнаах ханнык спортивный тэрээһиннэргэ кыттаҕытый ?
— Урут уруккуттан, өссө да мин үлэлии киириэм иннитттэн «Эстафета культуры и спорта» диэҥҥэ спорт өттүгэр куруук волейболга кытталлар этэ, билигин да кыттабыт. Майа сэлиэнньэтин иһинэн ыытыллар марафоннарга өрүү кыттааччылаах буолабыт. Ону таһынан куоракка баар сүрүн тэрилтэбит хайыһар күрэҕин эҥин ыыттаҕына, хайаан даҕаны баран эмиэ кыттыыны ылабыт.
— Сиһилии хоруйдарыҥ иһин улахан махтал!
— Эһиэхэ эмиэ махтал! Биһиги тэрилтэбит аатыттан улууспут олохтоохторугар кытаанах доруобуйаны, чөл олоҕу баҕарабын!
Кэпсэтиини сиһилии видеоҕа көрүҥ:
Суруйда: Мичийэ Семенова
Кэпсэттэ: Лида Попова,
Видеону таҥан оҥордо: Диана Билюкина,
Ф.Г. Охлопков аатынан Майа орто оскуолатын 8 «б» кылаас үөрэнээччилэрэ,
«Түмэн» медиа-киин кэрэспэдьиэннэрэ.
Кэскил14.ру