Муус устар 15 күнүгэр Ньурба улууһун Мэҥэдьэк нэһилиэгэр үүт сыаҕын аһыллар күүтүүлээх уонна үөрүүлээх бэлиэ түгэнэ буолан ааста.
Эрдэ даҕаны кэмиттэн кэмигэр үлэлии турбут үүппүт собуота саҥа хаһаайыннанан, биһиги, оройуон кииниттэн ыраах сытар нэһилиэк, аны бэйэбит оҥорон таһаарар үрүҥ аспытын аһыыр, атыылаһар кыахтаммыппыт олохтоохтору үөрдэр. Олохтоох дьоҥҥо үлэ миэстэтэ тахсара, үүт ас бородууксуйа оҥоһуллара нэһилиэк эрэ буолбакка улууспут сайдыытын түстүүр.
Бүгүҥҥү күҥҥэ маны барытын олоххо киллэрбит оскуола кэлэктиибэ буолар. Олох тыгыалас тымырын тутан олорор эдэр дьоммут саҥаны саҕалыыр, үтүө үгэстэри салҕыыр үлэлэрин уруйдуубут-айхаллыыбыт.
Нэһилиэкпитигэр сүөһүлээх ыал элбии-эбиллэ турдун, эт дэлэйдин, үрүҥ ас үрүлүйдүн! Саха дьонун үрүҥ тыынын өллөйдүүр төрүт дьарыга чэчирии сайдарыгар, сыһыы муҥунан сыспай сиэллээх, хонуу муҥунан хороҕор муостаах элбии-тэнийэ турарыгар, үүт-сүөгэй үрүлүйэ устарыгар, Хатыы сирэ сайда, силигилии турарыгар көмүс кылааттарын киллэрэр оскуола дириэктэригэр Тимофеев В.Г., Егоров Н.Т. уонна оскуола кэлэктиибигэр махтанабыт уонна киэн туттабыт.
Матрена Габышева, Хатыы орто оскуолата, Мэҥэдьэк.
Кэскил14.ру