Бу күннэргэ биһиги, «Кэскил» медиа оскуола юнкордара, Москва куоракка Бүтүн Арассыыйатааҕы «Юнкор» медиа форумҥа кыттыыны ыла сылдьабыт. Форуммут иккис күнүгэр юнармеецтарга анаан маастар кылаастары ыыттылар.
«Арт-Москва» отель конференц саалыгар Бүтүн Арассыыйатааҕы ыччат медиа киинин «Росмолодежь» куратора Дмитрий Чапков каадырга, сыанаҕа хайдах саҥарарга, туттарга-хаптарга маастар кылаас ыытта, бэйэтин туһунан сиһилии билиһиннэрдэ. Киһи дикцията тупсарыгар, холкутук саҥарарыгар бэйэтэ туттар ньымаларын көрдөрдө, скороговорка аахтарда, сөпкө тыынарга үөрэттэ.
– Улахан тэрээһиҥҥэ кыттаары туран долгуйар буоллаххытына, сөпкө тыыныҥ, уута иһиҥ, минньигэс сыттаах духууну сыттаан аралдьыйыахха эмиэ сөп, – диэн сүбэлээтэ.
Ити курдук кини бэйэтин уопутутуттан кэпсээтэ, үөрэттэ.
– Сыыһартан куттанымаҥ – ол эһиги инникитин өссө сайдаргытыгар туһалаах эрэ буолуо, – диэтэ.
Маастар кылаас түмүгүнэн Дмитрий Чапков саамай үчүгэй боппуруостаах юнкорга Кытайтан аҕалбыт бэлэҕин туттарда.
Салгыы эксперт Азиз Султанов медиа эйгэҕэ искуственнай интеллегы туһаныы туһунан кэпсээтэ. Статистика көрдөрөрүнэн, аан дойду үрдүнэн 84 бырыһыан киһи искуственнай интеллегы сатаан туттубат эбит. Азиз Султановы кытта искусственнай интеллект оҥорбут хаартыскаларын, видеоларын көрдүбүт, дьиҥнээх хартыыналары, видеолары кытта тэҥнээн ырытыстыбыт.
– Искуственнай интеллект тыынар киһи буолбатах. Кини сири-халлааны, тулалыыр эйгэни киһи курдук көрбөт, киһи ылынарын курдук ылыммат. Онон тыыннаах киһини солбуйбат, – диэн этэн туран, араас хаачыстыбалаах искуственнай интеллектэри көрдөрдө уонна олох сайдыытын кытта тэҥҥэ хардыылаан, ИИ-ны сөпкө туттан, туһалаах өрүтүн ылынарбытыгар сүбэлээтэ.
Ити курдук форуммут иккис күнэ олус интэриэһинэйдик ааста. Олохпутугар, үлэбитигэр туһаныахпытын сөптөөх саҥа билиилэри иҥэриннибит.
Туйаара МАМОНТОВА, Х кылаас,
М.Н. Готовцев аатынан Танда орто оскуолата, Уус Алдан
Мария Корякина хаартыскалара, VIII кылаас,
Ф.К. Попов аатынан Баатара орто оскуолата, Мэҥэ Хаҥалас